Генеральная пракуратура 30 кастрычніка распачала крымінальную справу па прыкметах злачынстваў, прадугледжаных ч.1 арт.289 (акт тэрарызму) і ч.4 ст.309 (наўмыснае прывядзенне ў непрыдатнасць шляхоў зносінаў) Крымінальнага кодэкса. Пра гэта паведамляе прэс-служба Генпракуратуры.
Справу распачалі за сапсаванне сродкаў сігналізацыі і іншага транспартнага абсталявання, якія забяспечваюць бяспеку чыгуначнага руху.
«Згодна з матэрыяламі справы, у мэтах дэстабілізацыі грамадскага парадку ў краіне і ў мэтах выканання размешчаных у сетцы Інтэрнэт заклікаў у кастрычніку 2020 года на аб’ектах інфраструктуры беларускай чыгункі мелі месца шматлікія факты наўмыснага прывядзення ў непрыдатны для эксплуатацыі стан сродкаў сігналізацыі і іншага транспартнага абсталявання, якія забяспечваюць бяспеку чыгуначнага руху», – адзначаюць у пракуратуры.
Паводле Генпракуратуры, такія дзеянні стварылі «небяспеку гібелі людзей, нанясення iм цялесных пашкоджанняў, аварыяў, крушэння, наступлення іншых цяжкіх наступстваў, якія выявіліся ў парушэнні стабільнай работы чыгуначнага транспарту».
Справа, як паведамляецца, распачатая ў дачыненні «неўстаноўленых асобаў». Расследаванне будзе праводзіць Следчы камітэт.
Нагадаем, раней на гэтым тыдні Аляксандр Лукашэнка заявіў, што акцыі па блакаванню чыгуначнага руху варта кваліфікаваць як тэрарызм. «Гэта дзеянні арганізаваных злачынных груп з прыкметамі тэрарызму. Мы пачынаем сутыкацца з тэрарыстычнымі пагрозамі», – падкрэсліў ён.
ІІ belsat.eu
