Гарадзенскім ідэолагам не спадабаўся жарт Hrodna.life, надрукаваны 1 красавіка. Цяпер рэдакцыі пагражаюць судом.
У панядзелак інтэрнэт-выданне пра жыццё Горадні апублікавала жартаўлівую нататку пра тое, што горад стане пабрацімам казахстанскага Нур-Султану, а замест бюсту Чапаева тут паставяць Назарбаева.
«У гарвыканкаме актыўна абмяркоўваюцца варыянты помніка, які можна падарыць у адказ жыхарам Нур-Султану. Паколькі тыя дораць помнік яшчэ жывога чалавека, лагічна адказаць тым жа. А паколькі былых прэзідэнтаў у Беларусі яшчэ няма, ідэолагі прапануюць падарыць сціплы помнік Віктара Лісковіча – намесніка старшыні аблвыканкаму Горадні», – гаворыцца ў артыкуле.
Рэакцыя мясцовых ідэолагаў здзівіла рэдактара сайту Аляксея Шоту, прызнаўся ён службе маніторынгу Беларускай асацыяцыі журналістаў.
«Мы пажартавалі пра тое, што гарадзенцы падараць Казахстану помнік Віктара Лясковіча, дастаткова важнай у горадзе асобы. І я думаў, што гэты чалавек з даволі добрым пачуццём гумару. Аднак ужо праз гадзіну пасля публікацыі жартаўлівай навіны на сайце пазванілі з аддзелу ідэалогіі аблвыканкаму і папрасілі прыбраць гэту інфармацыю. Бо, маўляў, будуць нейкія наступствы ў выглядзе суду», – распавёў Аляксей Шота.
Паводле Шоты, публікацыя была бяскрыўдным жартам, а калі справа дойдзе да суда – гэта будзе адзін з самых абсурдных судовых працэсаў.
Рэдакцыя Hrodna.life ужо судзілася з-за сваіх артыкулаў у 2017 годзе з камунальным унітарным прадпрыемствам «Гроднааблвідэапракат» – і выйграла суд.
ДД belsat.eu