У Віцебску 26 траўня прайшоў першы пікет па збору подпісаў за прэтэндэнтку ў кандыдаты на прэзідэнцтва Ганну Канапацкую. Яна сама прыехала ў горад Шагала. Ейны пікет быў выстаўлены каля гандлёвага цэнтру «Марка-сіці», у народзе яго называюць «піраміда».
Прэтэндэнтка ў кандыдаты ў прэзідэнты Ганна Канапацкая прызналася, што за першую гадзіну працы яны з камандай сабралі крыху больш за 40 подпісаў віцяблянаў, а ад пачатку ўсёй кампаніі – 7,5 тысячы па ўсёй краіне.
Намёк на 200 тысяч подпісаў, сабраных за 4 дні за Аляксандра Лукашэнку ўспрымае са смехам:
«Ну што я магу сказаць? Зайздрошчу!»
«Сёння, бачыце, я на пікеце, вось сябры маёй каманды. Гэта цяжкая праца! Пачынаецца дождж, але мы ўсё адно будзем стаяць. За гадзіну – 43 подпісы. Дык мы працуем! Менавіта гэта азначае, што я маю падтрымку сярод людзей. А заяўляць у паветра пра 200 тысяч… Ды я магу сказаць, што ў мяне сёння мільён сабраны! І наколькі гэтаму можна будзе верыць? Дык раблю ўсё, каб гэтая падтрымка была не толькі ў паветры, але і на паперы», – тлумачыць патэнцыйная кандыдатка.
Амаль з кожным, хто пакідае свой подпіс, Канапацкая размаўляе. Каля 10 хвілінаў яна эмацыйна тлумачыць віцебскім студэнткам, што яны ж маладыя і таму не мусяць быць такімі пакорлівымі, каб даваць подпісы пад прымусам.
Праз гадзіну пачаў накрапваць дожджык. Людзей паменела.
«Старт кампаніі – вельмі цікавы. З’явіліся людзі, якія не маюць на мэце змену ўлады ў Беларусі, то бок не з’яўляюцца сапраўднымі палітыкамі, але робяць усё, каб расцярушыць галасы і нарабіць перашкодаў для іншых удзельнікаў, якія маюць перад сабой абсалютна рэальныя мэты – змены ў Беларусі. З’явіліся людзі, якія гатовыя прадаць незалежнасць Беларусі. Думаю, што вашыя чытачы добра ведаюць, пра каго вядзецца [гаворка. – Belsat.eu] …», – кажа Канапацкая.
Свае шанцы на перамогу патэнцыйная кандыдатка бачыць «абсалютна рэальнымі». Але пры адной умове – калі будзе строга выконвацца дзейнае заканадаўства.
– А калі не будзе? – пытаемся.
– Рытарычнае пытанне, так? – смяецца Канапацкая.
Праз некаторы час на пляцоўцы перад «пірамідай» зʼяўляюцца яшчэ некалькі пікетаў для збору подпісаў – за Сяргея Чэрачня і Святлану Ціханоўскую.
Да століка з надпісам «Страна для жизни» (блог Сяргея Ціханоўскага, мужа Святланы) адразу выцягваецца невялікая, але чарга. Да пікету Канапацкай хвілін 15 зусім ніхто не падыходзіць.
Зборшчыкі подпісаў размаўляюць пра надворʼе, абмяркоўваюць паліто Канапацкай.
– Гэта сапраўдны «Шанэль»?
– Так, сапраўдны!
Крыху пазней экс-дэпутатка Палаты прадстаўнікоў знікае ў гандлёвым цэнты «Марка-сіці», каб ацаніць асартымент мясцовых буцікаў.
Пакуль яе няма, размаўляем з кіраўніком віцебскай арганізацыі БНФ Кастусём Смолікавым, які пакінуў подпіс за Канапацкую.
«Я за ўсіх падпісваюся, мне сімпатычныя людзі, якія хочуць [нешта змяніць. – Belsat.eu]. Амбіцыі для кандыдата – найперш. Толькі чалавек амбітны здолее павесці за сабой. Толькі чалавек, які заклікае нешта рабіць, а не адседжвацца ў хаце і не лайкаць у сацсетках. Гэтыя якасці мае Канапацкая», – упэўнены Смолікаў. Ён, дарэчы, адзіны сябра партыі БНФ на ўсю Беларусь, які быў уключаны ў абласную камісію па выбарах.
Подпісы за Канапацкую па чарзе пакідаюць дзве маладыя дзяўчыны.
«Ведаеце, я найперш супраць аднаго ўсім вядомага кандыдата, таму мне ўсё адно – абы не ён. Буду падпісваць не толькі за Канапацкую, бо хачу, каб у маім жыцці застаўся шанец…», – кажа дзяўчына, якая назвалася Кацярынай. Пасля пікету Канапацкай яна накіроўваецца да групы зборшчыкаў за Ціханоўскую.
Пакідае свой подпіс за Ганну Канапацкую і Віктар з віцебскага мікрараёну Білева, які прызнаецца, што апошні тыдзень не дастае ўдома з кішэні свой пашпарт, каб не забыцца на яго і пакінуць подпісы за ўсіх.
«Не толькі за Канапацкую падпісваюся. Вось і за Чэрачня аддаў. За дзейнага прэзідэнта – скажам так, думаю, ці варта, – яму і так хапае. Што прываблівае ў Канапацкай? Адназначна не скажу, але я за альтэрнатыву. Дык чаму ж не яна? Такая прыгожа жанчына!» – гаворыць віцяблянін.
Дожджык то ўзмацняецца, то перастае. Большасць віцяблянаў, якія ў гэты час вяртаюцца з працы дадому альбо ідуць у накірунку гандлёвага цэнтру, абыякава мінаюць актывістаў, што стаяць пад сцягам белага і чырвонага колеру. На ім напісана: «Я зраблю!»
Зміцер Казакевіч, фота Вячаслава Лазарава Belsat.eu