Яна патлумачыла на сваёй старонцы ў Facebook, што «не хоча ўдзельнічаць у дзіцячым шоу пракрамлёўскіх марыянетак».
Ганна Канапацкая адмаўляецца ад удзелу ў тэледэбатах. Кандыдатка на прэзідэнцтва паведаміла, што рашэнне ёй далося нялёгка. З аднаго боку два канкурэнты былі «прыбраныя рашучымі дзеяннямі свайго былога гаспадара» [гаворка ідзе пра Віктара Бабарыку і Валерыя Цапкалу, якіх ЦВК не зарэгістравала як кандыдатаў – belsat.eu]. Але з іншага яна не можа пераступіць праз маральныя і этычныя перакананні.
https://www.facebook.com/anna.kanopatskaya/photos/a.1096013083781126/3082479685134446/?type=3&theater
«Як палітык, які мае досвед і адбыўся, я не маю ані права, ані жадання спаборнічаць з заведама больш слабымі апанентамі. Удзельнічаць у дзіцячым шоу пракрамлёўскіх марыянетак, які складаецца з хлопчыкаў-спойлераў і дзяўчынак-хахатушак, дазволіць сабе не магу аніяк. Мне яшчэ краінаю кіраваць», – напісала спадарыня Капанацкая.
У панядзелак, 20 ліпеня, яна накіруе адпаведны ліст у ЦВК, у якім папросіць пераразмеркаваць вылучаны на яе на дэбаты час, для іншых кандыдатаў.
Ганна Капацкая стала адным з пяці зарэгістраваных ЦВК прэтэндэнтаў на прэзідэнцтва, нягледзячы на тое, што першапачаткова ў камісію яна здала на 30 тысячаў меней подпісаў, чым ёй у выніку залічылі.
Сёлета прэзідэнцкія выбары ў Беларусі пройдуць 9 жніўня.
КТ belsat.eu