Федэрацыя прафсаюзаў Беларусі прапануе стварыць адмысловы фонд для выплаты заробкаў пры банкруцтве прадпрыемства. Пра гэта паведамляе сайт арганізацыі.
Старшыня ФПБ Міхаіл Орда адзначыў, што ўсё больш прадпрыемстваў-банкрутаў назапашваюць даўгі па заробках, і звычайна крыніцаў для пагашэння запазычанасці ў іх няма.
Гэтак, толькі тыя арганізацыі, ліквідаваныя ў 2019 годзе, засталіся вінныя працаўнікам каля Br 9 млн заробку і ўнёскаў у Фонд сацыяльнай абароны насельніцтва.
«З улікам даўгоў за папярэднія гады гэтая сума складае каля Br 20 млн. І мы разумеем, што гэтыя сумленна заробленыя грошы людзі не атрымаюць, бо пры ліквідацыі прадпрыемства даўгі прызнаюцца згашанымі», – заявіў Орда.
Паводле яго, у Беларусі няма механізмаў, якія дазваляюць вярнуць ці кампенсаваць работнікам іх заробак, нават часткова. У выніку людзі пазбаўляюцца працы і заробку, губляюць частку свайго страхавога стажу і не могуць разлічваць на годную пенсію.
Старшыня ФПБ адзначыў, што ў шмат якіх краінах створаныя адмысловыя фонды для выплаты заробкаў працаўнікам прадпрыемстваў-банкрутаў. Арганізацыя прапануе ўвесці такія падыходы і ў Беларусі.
МГ belsat.eu