У Менску ў двары па вуліцы Талбухіна, жыхары якога выступаюць супраць будаўніцтва бізнес-цэнтру, пачалі пілаваць дрэвы. Пра гэта Belsat.eu паведамілі мясцовыя жыхары.
Бізнес-цэнтр будуе фірма «Вецер», падкантрольная буйной дэвелаперскай кампаніі «Сігмаполюс» бізнесоўцы Віталя Сініцкага. Паводле праекту, гэта будзе бізнес-цэнтр класа А з паркінгам на 126 машынамесцаў. Супраць будаўніцтва ў 2018 годзе выступілі мясцовыя жыхары: яны выходзілі на пікеты, падавалі скаргі ў дзяржаўныя органы і звярталіся ў суд. На іх думку, бізнес-цэнтр і паркоўка размешчаны надта блізка да іх дамоў ды закранаюць ахоўную зону «Генеральскага дому».
18 студзеня стала вядома, што пракуратура сапраўды знайшла парушэнні ў праекце: адлегласць новай паркоўкі да суседняга будынку на Талбухіна, 3 не адпавядае нормам. Тут раней месціўся гатэль «Дружба», а цяпер там – інтэрнат. Паводле заканадаўства, гэта розны тып будынкаў (адміністратыўны і жылы адпаведна) і адлегласць ад новай паркоўкі мусіць быць рознай. Але забудоўнік пры зацверджанні праекту падаваў старое пасведчанне, паводле якога на Талбухіна знаходзіцца менавіта адміністратыўны будынак гатэлю.
Затым, як распавялі прадстаўніцам ініцыятыўнай групы на прыёме ў старшыні Менгарвыканкаму Анатоля Сівака, Камітэт архітэктуры і «Галоўдзяржбудэкспертыза» адклікалі свае заключэнні па праекце – ад 23 студзеня будоўля фактычна лічыцца самавольнай.
Чыноўнікі шукалі механізмы спынення будаўніцтва і, нарэшце, 4 сакавіка выдалі заключэнне пра безадкладнае спыненне працаў на аб’екце дзеля ўрэгулявання пытанняў аб карэктаванні праекту. Нягледзячы на гэта, будаўніцтва працягваецца.
МГ / belsat.eu
