Фігурантка «справы БелТА» звярнулася з адкрытым лістом да прэс-службы Следчага камітэту

ВІДЭА

Будынак СК, фота sk.gov.by

Рэдактарка TUT.by ​​Ганна Калтыгіна, якая з 7 па 9 жніўня знаходзілася пад вартай у рамках «справы БелТА», звярнулася з адкрытым лістом да кіраўнікоў прэс-службы Следчага камітэту – Сяргея Кабаковіча і Юліі Ганчаровай.

Калтыгіна кажа, што аб тым, што яна затрыманая ў якасці падазраванай па «справе БелТА» яна даведалася з прэс-рэлізу СК, які быў апублікаваны ў 9.20. 7 жніўня. На гэты момант Калтыгінай і яе калегам яшчэ не было абвешчана аб падазрэнні і яны яшчэ не былі затрыманыя.

«Што гэта было – вы паспяшаліся, ці ўсё было вырашана загадзя – і пра падазрэнні і пра затрыманне, і следчыя нам хлусілі?» – пытаецца Калтыгіна.

Рэдактар ​​таксама адзначае, што СК ніколі ў сваіх прэс-рэлізах не называе імёны затрыманых і месца іх працы. Тлумачылася гэта звычайна тым, што людзям і прадпрыемствам нельга наносіць фінансавую і рэпутацыйную шкоду.

«А што змянілася ў гэты раз? Ваша прафесійная этыка, пра якую вы мне столькі разоў казалі, стала вельмі гнуткай? Цяпер вы заўсёды будзеце называць і прозвішчы, і прадпрыемствы? Тады выдатна, можна будзе абысціся без дакучлівых шлягераў пра «мы не называем» і «там жа працуюць людзі». А калі ўсё па-ранейшаму, то чаму наша кампанія і БелаПАН, а таксама Марына Золатава, Ганна Калтыгіна і Таццяна Каравянкова сталі выключэннем?»

Калтыгіна піша, што ў сюжэтах беларускага тэлебачання былі паказаныя кадры ператрусаў у кватэрах журналістаў і ў тым ліку буйным планам паказаныя банкаўскія карткі падазраваных з іх нумарамі.

«Вы ж працуеце ў Следчым камітэце, хоць бы і ў прэс-службе. Вы ж ведаеце, што можна зрабіць, маючы дадзеныя картак? Праз некалькі гадзін дадзеныя картак « замылілі», але скрыншоты зрабілі, і магчыма, не толькі мае калегі. Будзе сімвалічна, калі потым з-за гэтага давядзецца распачынаць крымінальную справу, праўда?»

Ператрус у Таццяны Каравянковай. Скрыншот ctv.by

Таксама Калтыгіна успамінае, што БТ апублікавала запіс праслухоўвання яе тэлефоннай размовы з Золатавай.

«Успомніце размовы, якія б вы хацелі не выкладаць на ўсеагульны агляд. Прадставілі? Можа быць, іх калісьці апублікуюць. Дакладна не я – у мяне не такая гнуткая этыка, як у вас, але магчыма тыя, хто запісвае чужыя размовы – і, магчыма, і вашыя таксама».

Калтыгіна пытаецца ў працаўнікаў прэс-службы СК, чаму яны ігнаравалі тэлефонныя званкі і паведамленні ў мессенджерах 7-9 жніўня, калі журналісты спрабавалі даведацца пра лёс сваіх затрыманых калег.

«Я выдатна разумею, што асабіста я з вамі, Сяргей Васільевіч (Кабаковіч) і Юлія Леанідаўна (Ганчарова), працаваць больш не буду. Асабіста я. І гэта маё рашэнне, а не ваша. Хачу проста сказаць персанальна вам, Юлія Леанідаўна. Калі я калі-небудзь (і шчыра – не дай Бог!) убачу вас затрыманай у калідорах СК, у асяроддзі операў і АМАПу, то я не памахаю вам элегантна далонькай. Бо я ўжо прачытаю загадзя нарыхтаваны рэліз, і буду ведаць, што вы падазраваная і затрыманыя. Я куплю вам бутэльку вады, шакалад і вільготныя сурвэткі. На Акрэсціна мне іх не хапала», – піша Калтыгіна.

Нагадаем, «справа БелТА» была распачатая паводле ч. 2 арт. 349 КК Беларусі – «несанкцыянаваны доступ да камп’ютарнай інфармацыі» (максімальнае пакаранне – 2 гады пазбаўлення волі). Паводле следства, цягам 2017-2018 гг. падазраваныя больш за 15 тыс. разоў незаконна карысталіся платнай падпіскай на стужку навінаў дзяржаўнага агенцтва БелТА.

  • Агулам 7-9 жніўня былі затрыманыя 18 журналістаў. Дзесяць з іх былі адпушчаны адразу пасля допытаў. Ператрусы таксама адбыліся ў офісе TUT.by, БелаПАН, дзяржаўнай газеты «Культура» і «Навука», парталу Realt.by, а таксама кампаніі «АйТиВи».
  • Журналістка БелаПАН Таццяна Каравянкова і рэдактаркі TUT.by Марына Золатава, Ганна Калтыгіна, Ганна Ермачонак і Галіна Уласік правялі за кратамі 2 содняў і былі вызваленыя 9 жніўня. Таксама 9 жніўня вызвалілі рэдактара сайта газеты «Белорусы и рынок» Аляксея Жукава, якога затрымалі 8 жніўня. Галоўную рэдактарку БелаПАН Ірыну Леўшыну і карэспандэнта Deutsche Welle у Беларусі Паўлюка Быкоўскага вызвалілі 10 жніўня. Усе яны застаюцца ў статусе падазраваных.
  • Дзеянні галоўнага рэдактара Марына Золатава былі кваліфікаваныя Следчым камітэтам па ч. 2 арт. 425 КК Беларусі («бяздзейнасць службовай асобы»). Максімальнае пакаранне паводле гэтага артыкулу – 5 гадоў пазбаўлення волі.

ІІ, belsat.eu, паводле TUT.by

Глядзі таксама
Каментары