Трэці год запар адміністрацыя Горадні ладзіць фестываль дзіцячых калясак у гонар Дня сям’і.
12 траўня ў гарадзенскім парку Жылібера прайшоў конкурс на самую цікавую дзіцячую каляску. Дызайнерскае спаборніцтва бацькоў адбывалася ў намінацыях «Марская», «Прырода-надвор’е», «Свет жывёлаў», «Экзотыка», «Прафесія» ды «Каляска арыгінальнага жанру».
Нашэсце вазкоў. Галерэя
Бацькі прайшлі, а дзеці – у незвычайных, яскравых калясках – праехаліся праз плошчу Леніна да Савецкай вуліцы. Падчас шэсця калона з каляскамі прыпынілася каля ЗАГСА на вуліцы Ажэшка, каб зарэгістраваць нованароджанага грамадзяніна Беларусі Платона.
Акрамя таго ўпершыню на фестывалі адбылося дэфіле дзіцячай моды з брэндамі беларускіх сетак крамаў з дзіцячай вопраткай. Таксама старэйшыя дзеці разам з бацькамі падрыхтавалі творчыя нумары.
«Галоўнай мэтай фестываля з’яўляецца папулярызацыя сямейных каштоўнасцяў, сямейных адносін і ўвогуле сям’і як асноўнай ячэйкі грамадства. Калона шматдзетных сем’яў таксама сёння ўдзельнічае ў шэсці з каляскамі», – тлумачыць адзін з арганізатараў фестывалю.
Усяго ў конкурсе ўдзельнічалі 63 гарадзенскія сям’і, Кожная атрымала падарунак за сваю творчасць – па пакунку ручнікоў.
Агулам у Горадні каля 1300 шматдзетных сем’яў, і, як падае адміністрацыя Ленінскага раёну, штотыдзень яны рэгіструюць яшчэ 3-5 новых шматдзетных сем’яў.
Папулярызацыя сям’і ў Беларусі ўжо даўно часткай дзяржаўнае палітыкі. Яшчэ ў 2013-м паводле колькасці разводаў Беларусь займала другое месца ў свеце. У 2016-м, паводле Белстату, на 64 536 новых шлюбаў прыпадае 32 628 разводаў – больш за 50 %.
Арганізатары фестывалю «Пад ветразем кахання» спадзяюцца, што налета імпрэза выйдзе па-за межы Ленінскага раёну і стане агульнагарадской.
Паўліна Валіш
