ЕЗ гатовы дапамагчы Беларусі ў прыцягненні інвестыцыяў, але толькі ў выпадку правядзення рэформаў.
Пра гэта сёння ў Менску заявіў кіраўнік аддзелу генеральнага дырэктарыяту па суседстве і перамовах аб пашырэнні Еўракамісіі Васіліс Марагас.
«Гэта будзе дапаўненнем да таго, што Беларусь зробіць праз палітыку рэформаў і стварэнне сваёй рэпутацыі і ўмоваў для інвестараў», – заявіў прадстаўнік Еўракамісіі.
Гэтае пытанне будзе абмяркоўвацца на форуме «Пашыраючы гарызонты: інвестыцыі, фінансы, развіццё».
Васіліс Марагас адзначыў, што эксперты абмяркуюць крокі Беларусі ў плане выканання фундаментальных правоў чалавека:
«Мы спадзяемся, што будучая палітыка ўраду возьме пад увагу гэта».
На думку Васіліса Марагаса, Беларусь робіць пэўныя крокі для прыцягнення інвестыцыяў, у тым ліку паляпшае інвестыцыйны клімат, і праводзіць пэўныя рэформы, пра што сведчаць даволі высокія месцы ў міжнародных рэйтынгах.
Прадстаўнік Еўракамісіі таксама выразіў спадзяванне, што ў Беларусі спецыялісты будуць больш валодаць замежнымі мовамі.