3 ліпеня Еўрапейскі парламент абраў новага старшыню. Ім стаў італьянскі палітык і журналіст Давід-Марыя Сасолі, які прадстаўляе сацыялістаў. Пра гэта паведамляе Reuters.
На гэтай пасадзе Сасолі, які з’яўляецца дэпутатам Еўрапарламенту з 2009 года, змяніў іншага італьянца – Антоньё Таяні з правацэнтрысцкай Еўрапейскай народнай партыі.
Таксама былі намінаваныя і іншыя кандыдатуры на ключавыя пасады ў Еўрапейскім звязе.
Гэтак, Еўракамісію мае ўзначаліць міністарка абароны Нямеччыны Урзуля фон дэр Ляен, а Еўрапейскі цэнтрабанк – дырэктарка Міжнароднага валютнага фонду, францужанка Крыстын Лягард. Яны абедзве прадстаўляюць Еўрапейскую народную партыю.
Бельгійскі ліберальны прэм’ер Шарль Мішэль прапанаваны на пасаду Еўрапейскай рады, а іспанскі міністр замежных справаў Жасэп Барэль, які прадстаўляе сацыялістаў, мае ўзначаліць вонкавапалітычнае ведамства ЕЗ.
Нагадаем, што на выбарах у Еўрапарламент, якія прайшлі ў траўні, Еўрапейская народная партыя (ЕНП) і Прагрэсіўны альянс сацыялістаў і дэмакратаў упершыню згубілі большасць і не змаглі сфармаваць «вялікую кааліцыю» без падтрымання іншых сілаў.
МГ belsat.eu