Будаўнікі з Менску стварылі гурт і даюць аншлагавыя канцэрты ў Еўропе


Альбом «Этажи» гурту «Molchat doma», выдадзены берлінскім лэйблам «Detriti Records», мае паўтара мільёна праслухоўванняў на «YouTube», квіткі на канцэрты распрадаюцца за некалькі тыдняў да выступу. Ужо амаль месяц расейскамоўнае пост-панк-трыа з Менску гастралюе па Еўропе. Belsat.eu спаткаў няўлоўных музыкаў у Нямеччыне і спытаў, чаму яны амаль не выступаюць на радзіме, і як так атрымалася, што многія іхныя фанаты не размаўляюць па-расейску.

Гурт «Молчат дома» у Берліне.
Фота: Belsat.eu

Urban Spree – моладзевае месца ва ўсходнім Берліне, вядомае сярод аматараў альтэрнатыўнай музыкі. Праз некалькі хвілін пачнецца выступ менскага гурта. Квіткі на гэты канцэрт былі прададзеныя за некалькі тыдняў да выступу. Таму ў Берліне хлопцы выступаюць два дні запар. На разагрэве ў беларусаў – італійцы з «Words and Actions». Нягледзячы на тое, што менскія пост-панкі спяваюць выключна на расейскай мове, іх слухачы далёка не ўсе расейскамоўныя. Англійская, іспанская і нямецкая – мовы, які найчасцей гучаць на танцполе.

– Пару месяцаў назад пачуў хлопцаў на «Spotify», – кажа малады бразілец. Побач з ім – мужчына з Ліверпулю, за імі – дзве мексіканкі, справа – вялікая групоўка нямецкіх маладзёнаў. Усе яны знайшлі «Молчат дома» у інтэрнэце.

Канцэрты ў Берліне і Варшаве часцей, чым у Менску

Нямецкая прэса ўжо назвала беларускі гурт унікальным усходнееўрапейскім варыянтам «Joy Division» (брытанскія піянеры пост-панку 70-ых), а буйнейшы культурніцкі еўрапейскі тэлеканал ARTE акрэсліў іх пачынальнікамі новага cold wave.

Вакаліст Ягор Шкутко і гітарыст Раман Камагорцаў заснавалі гурт у 2017 годзе. Пазней да іх далучыўся басіст Павел Казлоў. Усе свае трэкі хлопцы выкладалі ў інтэрнэт. Праз «Soundcloud» іх знайшлі супрацоўнікі берлінскага лейблу «Detriti Records» і прапанавалі супрацоўніцтва. Выдадзены летась альбом «Этажи» трапіў у спіс лепшых пост-панк рэлізаў 2018 году па версіі сайту post-punk.com. Менавіта пасля гэтага і ўзрасла міжнародная ўвага да калектыву, узгадваюць музыкі. У сваё першае міжнароднае турне хлопцы паехалі сёлета ўвесну. За два тыдні – 14 гарадоў, пляцоўкі на пару сотняў чалавек. Цяпер гурт пасярэдзіне новых еўрапейскіх гастроляў, якія працягнуцца да пачатку лістапада. Выступы амаль штодня.

«Бывае цяжка і фізічна і псіхалагічна, але калі са школы пра гэта марыш, то нармальна», – каментуюць музыкі свой шчыльны графік. Хлопцы выглядаюць крыху стомленымі, але падбадзёрваюць адзін аднога жартамі.

«Molchat doma» граюць пост-панк, іхная музыка і вобразы нагадваюць 1980-я. Натхнёныя Цоем, «Depeche Mode» і савецкай архітэктурай, яны хутка знайшлі сваю аўдыторыю на Захадзе. У верасні гурт выступаў на фестывалі «Lidbeer» у Лідзе, у жніўні – на сумесным акустычным канцэрце ў менскім клубе «Re:Public». Але ніводнага сольніка ў Беларусі ў каманды пакуль не было.

«Магчыма, у нас такую музыку ўжо пераслухалі. Я нават не ведаю, колькі мы можам сабраць у Беларусі людзей. Магу сказаць за Берлін, Варшаву, а пра Менск нават не маю ніякага ўяўлення», – кажа вакаліст Ягор Шкутко.

Акрамя таго, у Беларусі ёсць гастрольныя пасведчанні, дазволы ды іншая бюракратыя, а таксама негатовасць беларускіх слухачоў адкрываць новыя гурты – так тлумачаць хлопцы адсутнасць сваіх канцэртаў на радзіме.

«У Беларусі ніхто не будзе плаціць грошы, каб паслухаць групу ўпершыню. У Еўропе ўсё наадварот: тут вялікая цікавасць да чагосьці новага», – кажа Ягор.

Раман Камагорцаў, Ягор Шкутко, Павел Казлоў.
Фота: Molchat Doma

Электрык, тынкоўшчык і зваршчык

Берлінская публіка прымае музыкаў цёпла. Многія песні ім добра вядомыя. Паводле хлопцаў, 30 адсоткаў слухачоў іх музыкі – з Мексікі. Пад відэа на «YouTube» каментары – збольшага па-англійску. Музыкі смяюцца, што нават фэйкавыя акаўнты ствараюць. Польскі фанат аднойчы пераклаў адну з песень на сваю мову. «Таму, магчыма, па-польску заспяваем», – жартуюць маладзёны. Ні па-англійску, ні па-беларуску гурт выконваць песень не плануе. Не з прынцыпу, а праз адсутнасць адпаведных моўных ведаў.

Яшчэ некалькі месяцаў таму хлопцы мелі сталую працу ў Менску, ніяк не звязаную з гастролямі. «Мы будаўнікі: электрык, тынкоўшчык і зваршчык», – кажуць музыкі. Апошнія месяцы Ягор працаваў у сферы продажу электрычнага абсталявання, Павел быў прарабам.

«Таму калі штосьці не атрымаецца, зможам скалаціць каманду і пайсці халтурыць», – смяюцца музыкі. Але выглядае, што не бліжэйшым часам. Наперадзе ў гурта – выступ на буйным еўрапейскім фестывалі «Eurosonic» у Нідэрландах, праца над новым альбом і планаванне новага еўрапейскага турне.

Наста Кахановіч Belsat.eu

Стужка навінаў