Мэн Хун Ўэй, які раней узначальваў Інтэрпол, прызнаны вінаватым у карупцыі і асуджаны да 13 з паловай гадоў пазбаўлення волі. Такі прысуд агучыў суд у КНР, паведамляе DW.com.
Акрамя 13 з паловаю гадоў турэмнага зняволення, Мэн Хун Ўэй заплаціць штраф у памеры два мільёны юаняў (каля 260 тысячаў еўраў).
Пасля абрання на пасаду старшыні Інтэрполу Мэн Хун Ўэй у 2016 годзе пераехаў у французскі Ліён. Але ў верасні 2018 года Мэн знік, што выклікала вялікі рэзананс. Пазней стала вядома, што ён накіраваўся ў Кітай, дзе яго затрымалі паводле падазрэнняў у карупцыі.
Суд па яго справе распачаўся ў чэрвені летась. Мэн Хун Ўэй прызнаўся, што атрымліваў хабары на агульную суму каля 2,1 млн долараў у той час, калі ён узначальваў марскую паліцыю і займаў пасаду намесніка міністра грамадскай бяспекі КНР.
СК belsat.eu