Былы кіраўнік Савета міністраў Крыму Анатоль Магілёў кажа, падчас Майдану да яго на паўвостраў прыязджаў памочнік прэзідэнта РФ Уладзіміра Пуціна Уладзіслаў Суркоў.
Пра гэта ён распавёў у інтэрв’ю выданню «Украінская праўда».
«Я з Сурковым сустракаўся, калі ён прыязджаў у Крым, у канцы 2013 ці пачатку 2014 года. З ім прыехалі яшчэ 4-5 чалавек», – паведаміў Магілёў.
Паводле яго слоў, сваю світу Суркоў прадставіў як «работнікаў інжынерных службаў».
Магілёў кажа, што мэтай візіту было абмеркаванне магчымага будаўніцтва Керчанскага мосту.
«Гаворка ішла пра тое, што яшчэ ў 1995 ці 1997 году было падпісана сумеснае пагадненне Украіны і Расеі аб узвядзенні Керчанскага моста. Гэты дакумент хадзіў паміж Расеяй і Украінай у кабінетах міністраў, яно абмяркоўвалася, ішло ўзгадненне службаў. Адно з узгадненняў завісла ў Кіеве», – распавядае экс-кіраўнік Саўміна.
Паводле яго слоў, Суркоў запэўніваў, што прыезд звязаны толькі з гэтым.
24 студзеня экс-кіраўнік Савета міністраў АРК і МУС Украіны Анатоль Магілёў даў паказанні ў Абалонскім раённым судзе Кіева па справе аб дзяржаўнай здрадзе Віктара Януковіча. Там ён распавёў, што падчас сустрэчы 21 лютага 2014 года ў Кіеве з экс-прэзідэнтам той казаў яму пра пагрозу свайму жыццю.
КА, belsat.eu
