Дзяржаўныя медыі: «Заклікаем не ўжываць сілу да тых, хто выказвае меркаванне»

Заяву міністру інфармацыі занеслі журналісты дзяржаўных СМІ.

Журналісты дзяржаўных медыяў стварылі афіцыйны зварот на адрас міністра інфармацыі Беларусі, паведамляе Tut.by.

Падпісанты звароту просяць дапамагчы ў вызваленні затрыманых журналістаў, не пазбаўляць жыхароў краіны якаснай сувязі і не перашкаджаць працы навінавых парталаў.

Пад зваротам падпісаліся больш як 40 чалавек, сярод іх больш кожны трэці – працаўнік БелТА.

«Звязда» выступіла з асобным зваротам

Таксама супрацоўнікі газеты «Звязда» «з неспакоем і болем» глядзяць на тое, што адбываецца ў краіне.

«Звяздоўцы выказваюць падтрымку ўсім без выключэння, хто пацярпеў у канфліктах апошніх дзён, іх сем’ям і блізкім. Мы заклікаем паважаць журналістаў, якія працуюць на месцы падзей і выконваюць свой прафесійны абавязак. Заклікаем не ўжываць сілу ў дачыненні да тых, хто выказвае сваё меркаванне, і не праяўляць агрэсію, няважна, на якім баку вы знаходзіцеся. Заклікаем усіх паважаць закон, але найперш – чалавечую годнасць. Гвалт можа спарадзіць толькі гвалт», – гаворыцца ў звароце выдання.

Журналісты падкрэслілі, што паводле беларускага заканадаўства кожны грамадзянін краіны мае права адкрыта выказваць сваю пазіцыю, а правы і свабоды з’яўляюцца неадʼемнай часткай гарманічнага і згуртаванага грамадства.

Журналісты дзяржаўнага ТБ масава сыходзяць з працы

МГ belsat.eu

Hавiны