Дзяржаўная пазыка Беларусі на 1 чэрвеня склала Br 43,9 млрд. Як паведамілі ў Міністэрстве фінансаў, яна зменшылася ў параўнанні з пачаткам года на 3,3 % (1,5 млрд беларускіх рублёў).
Вонкавая дзяржаўная пазыка на 1 чэрвеня склала $ 16,6 млрд, знізіўшыся з пачатку года на $ 0,3 млрд (на 1,7 %).
У студзені-траўні Беларусь атрымала вонкавых пазыкаў на $ 326,7 млн ад урада і банкаў Расеі, Міжнароднага і Еўрапейскага банкаў рэканструкцыі і развіцця, Паўночнага інвестыцыйнага банку і Экспартна-імпартнага банку Кітая.
Пагашана вонкавай дзяржаўнай пазыкі было на $ 660,5 млн.
Унутраная дзяржаўная пазыка на 1 чэрвеня склала Br 9,1 млрд, павялічыўшыся з пачатку года на Br 0,2 млрд (на 2,2 %).
За пяць месяцаў унутраных валютных дзяржаўных аблігацый было размешчана на $ 500,3 млн. Кампенсавана аблігацый на $ 157,3 млн.
МГ belsat.eu