Аргкамітэт святкавання Дня Волі ў Магілёве прыйшоў да высновы, што зараз не самая спрыяльная сітуацыя, каб ладзіць масавыя сходы.
Святкаванне Дня Волі ў Магілёве аргкамітэт перанёс на 27 ліпеня. Арганізатары вырашылі не рызыкаваць і не ігнараваць каронавірус. 27 ліпеня – дзень, у які 30 год таму Вярхоўны Савет БССР прыняў дэкларацыю аб дзяржаўным суверэнітэце.
Папярэдне ў Магілёве ў нядзелю 23 сакавіка мусіла прайсці ўрачыстае святкаванне Дня Волі. Было арэндаванае памяшканне, складзеная праграма, запрошаны музыкі. Таксама была запланавана экскурсія і квэст.
Сябра аргкамітэту па святкаванні Дня Волі ў Магілёве Уладзімір Шанцаў кажа, што пір падчас чумы не патрэбны:
«З-за таго, што зараз адбываецца, мы не можам да ўзроўню ўлады апускацца і рабіць выгляд, што нічога не няма. Хаваць галаву ў пясок – гэта не пра нас. Дэкларацыя аб дзяржаўным суверэнітэце была першым дакументам незалежнай Беларусі. Таму вырашылі на гэтую круглую дату перанесці і святкаванне Дня Волі. Мы спадзяёмся, што да 27 ліпеня сітуацыя нармалізуецца і будзе бяспечна запрашаць людзей на масавыя сходы».
Магілёўскі аргкамітэт надрукаваў тэматычныя паштоўкі да Дня Волі. Іх распаўсюдзілі па партыях і грамадскіх арганізацыях, а пэўную частку раздалі на вуліцы жыхарам Магілёва.
Вольга Васільева Belsat.eu