Дыферэнцыяцыя грамадства па колеры штаноў ды арышт Навальнага – тыдзень у малюнках
Беларускія ўлады згубілі ўжо другую сваю любімую цацку – буйное міжнароднае спаборніцтва, а расейскія ўлады паціху ідуць па слядах беларускіх. Мастак Дэ Лёс узгадвае для «Белсату» мінулыя падзеі і дзеліцца ўласным поглядам на іх.
Перанеслі з Менску ЧС па пяцібор’ю
Менск пазбавілі права правядзення чэмпіянату свету па сучасным пяцібор’і «з-за нестабільнай сітуацыі ў краіне». Спаборніцтва павінна было прайсці 7-13 чэрвеня. Турнір адбудзецца ў тыя ж даты, але дзе, пакуль невядома. Гэта другое буйное міжнароднае спаборніцтва, прычынай пераносу якога з Беларусі стала нестабільная сітуацыя ў краіне. Менск таксама не прыме чэмпіянат свету па хакеі. Перанесці з Менску абодва заклікаў Беларускі фонд спартыўнай салідарнасці.
Затрымалі за штаны не таго колеру
Гарадзенку затрымалі і далі штраф у 20 базавых за штаны з бела-чырвонымі лампасамі. Жанчыну затрымалі, калі яна ішла па вуліцы і піла каву. У пратаколе напісалі, нібыта яна ўдзельнічала ў пікеце, крычала «Жыве Беларусь». Але міліцыянт ад рукі яшчэ складаў тлумачальную – там было пра колер штаноў, які «парушае грамадскі парадак». Як казалі ў вядомым фільме, «калі ў грамадства няма колеравай дыферэнцыяцыі штаноў, то няма мэты! А калі няма мэты – няма будучыні!»
Салідарнасць спыніла галадаванне палітвязня
Ігар Лосік галадаў 41 дзень. Так ён пратэставаў супраць неабгрунтаванага арышту. Па ўсёй краіне праходзілі акцыі падтрымання, дзеці рабілі малюнкі «Дзядзька Ігар, еш». Дзякуючы гэтаму, а таксама людзям, якія распачалі галадоўку на салідарнасць з Ігарам, 25 студзеня вязень спыніў небяспечную акцыю пратэсту. У яго ўжо пачаліся праблемы са здароўем.
Затрымалі галоўнага расейскага апазіцыянера
Вяртанне на радзіму расейскага блогера Аляксея Навальнага пасля атручвання ў Томску і лекавання ў Берліне сталася імпрэзай у прамым эфіры. У аэрапорце Навальнага затрымалі. Як кажуць шматлікія юрысты, абсалютна незаконна. І як кажуць, шматлікія аналітыкі, цалкам прадказальна. Пасля затрымання Фонд барацьбы з карупцыяй Навальнага апублікаваў расследаванне пра прэзідэнта Пуціна, яно набрала ўжо амаль 90 млн праглядаў. Для параўнання, у Расеі пражывае каля 140 млн чалавек.
Ланцугі салідарнасці ў Расеі і Беларусі
На падтрыманне расейскага апазыянера Аляксея Навальнага ланцугі салідарнасці сталі і ў Расеі, і ў Беларусі. Беларусы прынеслі да расейскай амбасады ёршыкі для ўнітазаў як сімвал карупцыйнасці ўладаў. 700 еўраў – столькі каштуе 1 ёршык для ўнітаза ў палацы Пуціна, паводле расследавання Навальнага.
Разгоны мітынгаў у Расеі
У суботу 23 студзеня на заклік прыхільнікаў Навальнага на вуліцы розных расейскіх гарадоў выйшлі дзясяткі тысяч пратэстоўцаў. Іх даволі жорстка разагналі. Хаця, як кажуць, што з чым параўноўваць. Вось тут мы параўналі.
Развітальнае набажэнства Кандрусевіча
У нядзелю, 24 студзеня, арцыбіскуп Тадэвуш Кандрусевіч адслужыў развітальную службу. З 21 студзеня на пасаду апостальскага адміністратара Менска-Магілёўскай архідыяцэзіі афіцыйна ўступіў біскуп Казімір Велікаселец. Раней гэтую пасаду займаў Кандрусевіч. Пасля свайго 75-годдзя Кандрусевіч папрасіў Папу Рымскага Францішка з увагі на ўзрост дазволу сысці на пенсію. Аднак мала хто сумняецца, што прычына сыходу Тадэвуша Кандрусевіча – палітычныя.
AB, belsat.eu
