Беларускіх лёгкаатлетаў Аніса Ананенку і Алену Матошка дыскваліфікавалі за парушэнне антыдопінгавых правілаў падчас Алімпійскіх гульняў 2012 года ў Лондане. Пра гэта паведамілі ў Міжнародным алімпійскім камітэце.
Рашэнне прынятае па выніках пераправеркі пробаў лонданскай Алімпіяды.
Гэтак, у крыві бегуна на 800 метраў Аніса Ананенкі, які на гульнях заняў 43-е месца, выявілі дэгідрахлорметылтэстастэрон. Раней яго адлучала ад выступаў на чатыры гады Нацыянальнае антыдопінгавае агенцтва Беларусі, якое летам 2015 года выявіла ў арганізме атлета генны допінг GW 1516.
У арганізме кідальніцы молата Алены Матошка выяўлены аксандралон. У Лондане яна заняла 25-е месца.
МАК пастанавіў дыскваліфікаваць спартсменаў і ануляваць іх вынікі. Нацыянальнаму алімпійскаму камітэту Беларусі даручана забяспечыць выкананне гэтага рашэння.
Разам з беларусамі таксама быў дыскваліфікаваны азербайджанскі штангіст Валянцін Хрыстаў, які на Алімпіядзе 2012 года заняў трэцяе месца ў вагавай катэгорыі да 56 кілаграмаў.
МГ belsat.eu