У Горадні ў звычайнай кватэры 3-га студзеня знайшлі адразу тры трупы: бацькоў сталага веку ды іхнага сына. Следчы камітэт вядзе правяранне, але настойвае, што крымінальнага следу няма.
Трагічнае здарэнне адбылося ў Горадні ў кватэры звычайнага пяціпавярховіку на вул. Пушкіна. 3-га студзеня суседзі паведамілі працаўнікам МУС пра незвычайны пах. Кватэру ўскрылі, а там выявілі тры трупы: 65-гадовых мужа і жонкі ды іхнага 39-гадовага сына. Таксама выявілі бутэльку з-пад спіртнога, з якой будуць працаваць эксперты.
Журналісты «Белсату» прыехалі на месца трагедыі, каб распытаць суседзяў. Жыхарка суседняй кватэры сталага веку адзначыла, што ведала сям’ю памерлых ужо шмат гадоў: сама жыве ў будынку яшчэ з 1970-х. Ніякіх заганных звычак за імі не заўважала.
Разам з тым, жанчына скардзіцца на журналістаў, якія нібыта спрабуюць выставіць памерлых суседзяў алкаголікамі: «Што там адбылося? Хай следчыя разбіраюцца. Але гэта не пра алкаголь, як пішуць журналісты. Ніякіх дадатковых газавых балонаў у іх не было, таму і з атручаннем газам гэта не звязанае. Міліцыю выклікала не я, бо сама ніякага паху не чула».
Суседзі з іншай кватэры на тым самым паверсе маюць крыху іншае меркаванне: «Мы наагул у шоку! Ніякіх гулянак там не было, заўжды віталіся пры сустрэчы. Ну, выпівалі па святах… Але я б не сказала, што сям’я асацыяльная. Вось на чацвёртым паверсе – там жорстка. А тут – не. Сын выпіваў, гэта праўда… Працаваў ці тое на будоўлі, ці тое на прадпрыемстве. Бацькі ягоныя даўно на пенсіі».
Суседзі кажуць, што апошні раз бачылі памерлых недзе 26–27 студзеня, за некалькі дзён да Новага года. У версію з газам не вераць, але і ў алкагольнае атручанне таксама: «Паху газу мы не чулі. А калі б алкаголем атруціліся, то не ўсе адразу б, праўда? Нехта б выклікаў медыкаў. Следчы сказаў, што два трупы мужчынаў знайшлі на падлозе, адзін – жаночы – у крэсле. Наўрад ці б яны на падлозе спалі, таму гэта і не ў сне смерць…»
Паводле сайту Следчага камітэту, на гэты момант вядзецца правяранне, канчатковых высноваў аб прычынах смерці няма. Разам з тым, ніякіх прыкметаў таго, што нехта прабраўся ў кватэру, або прыкметаў гвалтоўнай смерці няма таксама.
АК, фота Васіль Малчанаў belsat.eu