28 чэрвеня 1942 году Янка Купала загінуў – упаў у лесвічны пралёт у гатэлі «Масква» у сталіцы СССР. Згодна з афіцыйнай версіяй, момант і абставіны здарэння ніхто не бачыў, таму справу адразу зачынілі. Аднак дагэтуль робяцца спробы разабрацца ў тым, як адбылася загадкавая трагедыя.
Дэтэктыў ад гісторыі Андрэй Цісецкі, былы афіцэр міліцыі, які шмат год прысвяціў гісторыі беларускіх праваахоўных органаў і спецслужбаў, у інтэрв’ю «Белсату» падае сваю версію прычынаў гібелі беларускага паэта.
– Як вы сталі «дэтэктывам ад гісторыі»?
– Цікавасць да гісторыі мне перадала бабуля – вясковая настаўніца гісторыі. І я ў свой час паступаў на гістфак БДУ, не хапіла паловы балу. Адслужыў у войску, а потым, як параіў сваяк, пайшоў вучыцца ў Акадэмію Міністэрства ўнутраных спраў па спецыяльнасці «вышукова-аператыўная дзейнасць». Пасля 5 год працаваў у міліцыі.
Пачаў займацца гісторыяй беларускай антысавецкай дзейнасці, міліцыі, крыміналу, пратэстнага руху, у першую чаргу на маёй Радзіме – на Барысаўшчыне і наваколлі. Стаў шукаць і вывучаць мемуары мясцовых людзей, у тым ліку нідзе не друкаваныя да таго часу рукапісы.
У нас іх ніхто асабліва не чытае, а там шмат чаго цікавага можна знайсці, нават у тых, што публікаваліся ў савецкі час і праходзілі жорсткую цэнзуру перад друкам.
Шмат сустракаюся з непасрэднымi ўдзельнікамі гістарычных падзеяў, іх нашчадкамі, сваякамі, краязнаўцамі, прафесійнымі гісторыкамі. Выкарыстоўваю матэрыялы з дзяржаўных і сямейных архіваў, а таксама адмысловую літаратуру.
Паступова мае даследаванні сталі публікавацца ў краязнаўчых выданнях, на гістарычных інтэрнэт-рэсурсах, а таксама ў часопісе «Міліцыя Беларусі». Прымаў удзел у падрыхтоўцы да выдання кнігі «Беларускі крымінальны вышук – 100 год» разам з гісторыкам, таксама афіцэрам міліцыі ў адстаўцы, Юрыем Курʼяновічам.
– Як нарадзілася вашая версія смерці Янкі Купалы?
– Па вялікім рахунку стыхійна так атрымалася. Я займаўся тэмай нямецкай акупацыі, тэмай беларускага незалежніцкага падполля. Сышліся думкі на тым, што смерць Янкі Купалы звязаная з барысаўскімі падзеямі, у першую чаргу са Станіславам Станкевічам, бургамістрам Барысава ў той час, з таямніцамі семʼяў Станкевіча і Купалы.
– Якім чынам у 1942 годзе Барысаў і Станкевіч былі звязаныя з Купалам?
– Нічога б не было, каб не сустрэча з Максімам Клімковічам, унукам Міхася Клімковіча – першага старшыні Рады Саюза пісьменнікаў БССР (з 1934 па 1938 год), будучага аўтара гімна БССР. Максім Клімковіч распавёў, што ягоны дзед падчас нямецкай акупацыі сустракаўся са Станіславам Станкевічам.
Станкевіч прапанаваў яму паставіць ягоную гістарычную пʼесу «Барбара Радзівіл», а атрымаўшы адмову з-за таго, што дачка Клімковіча на савецкай тэрыторыі, і пастаноўка можа прывесці да рэпрэсіяў супраць яе, абараніў Міхася Клімковіча ад арышту немцамі і параіў яму сыходзіць да партызанаў. Што той і зрабіў.
У той жа час Станкевіч распавёў Клімковічу, што хацеў паставіць на сцэне купалаўскую «Паўлінку», але гэтага не дазволіла зрабіць нямецкая цэнзура.
– Што магло звязваць Станкевіча з Купалам?
Купала ж быў звязаны з Барысаўшчынай гісторыяй сваёй сямʼі, яго тут добра ведалі, а жонка Янкі Купалы Уладзіслава Станкевіч, на маю думку, магла быць сваячкай бургамістра (хаця б па меркаванні самога Станіслава Станкевіча). Нават апошняя кніга Станкевіча (выйшла ўжо пасмяротна) прысвечаная асобе Янкі Купалы.
Купала загінуў 28 чэрвеня – літаральна за некалькі дзён да свайго 60-годдзя. Праўдападобна, менавіта на гэтую дату Станкевіч планаваў пастаноўку «Паўлінкі» і, як мне бачыцца, урачыста адзначыць юбілей песняра ў акупаваным немцамі Барысаве.
Гэтую інфармацыю мог перадаць савецкім партызанам Клімковіч, а тыя – у Маскву.
– Думаеце, гэта штурханула б камуністаў на забойства?
Вядома, што прэтэнзіі да Янкі Купалы ў бальшавіцкага рэжыму ўзнікалі яшчэ ў 1930-я не толькі з-за ягоных старых заслугаў перад беларускім незалежніцкім рухам, але і з той прычыны, што ў Віленскай беларускай гімназіі, дзе дырэктарам быў Радаслаў Астроўскі, будучы кіраўнік Беларускай Цэнтральнай Рады, адбываліся ўрачыстасці ў гонар паэта на ягонае 50-годдзе.
Кіраўнік Кампартыі БССР Панцеляймон Панамарэнка ў 1938 годзе пісаў пра патрэбу арыштаваць і судзіць як ворагаў народу, і Купалу, і Якуба Коласа.
Тое ж самае магло адбыцца ў ліпені 1942г. Гучнае святкаванне купалаўскага юбілею беларускімі нацыяналістамі было б аплявухай і Панамарэнку, і Сталіну.
– У той час як раз актывізавалася дзейнасць Беларуснай Самапомачы ў Менску, планавалася пашырэнне яе паўнамоцтваў, стварэнне антысавецкіх беларускіх фарміраванняў Самааховы…
– Гэта быў час вельмі складаны для СССР. Савецкая махіна, як і ў 1941 годзе, трашчала па швах, адбылася Харкаўская катастрофа – савецкія войскі былі разгромленыя на Паўднёвым і Паўднёва-Заходнім франтах і пачаўся нямецкі стратэгічны наступ на Каўказ і Волгу.
– У дзень смерці Купалы 28 чэрвеня быў выдадзены загад №227 «Ані кроку назад!»
– Так, у тых нервовых абставінах, якія былі ў Крамлі, Панамарэнка мог атрымаць інфармацыю пра тое, што «заядлы нацыяналіст» Станіслаў Станкевіч праслаўляе беларускіх літаратараў, якіх Панамарэнка таптаў, душыў, але так да канца і не змог знішчыць.
Да таго яшчэ ў лютым 1942 года Купалу прыйшлося публічна апраўдвацца за «вуліцу Луцэвіча», якая ў акупаваным немцамі Менску быццам бы была названая ў ягоны гонар. Хоць на самой справе, гэта была вуліца Луцкевіча, а не Луцэвіча.
– Як жа, на ваш погляд, было арганізавана забойства?
– Згодна з маёй версіяй, інфармацыя пра магчымае святкаванне 60-годдзя Янкі Купалы ў Барысаве даходзіць да Панамарэнкі, ён у шоку і загадвае падначаленым яму па лініі партызанскага руху супрацоўнікам НКВД арганізаваць Купале «няшчасны выпадак», каб не дапусціць адначасовага святкавання юбілею паэта і ў Маскве, і ў акупаванай немцамі Беларусі.
На ракавую лесвіцу Купалу, згодна з успамінамі сведкаў, выклікаў тэлефонны званок супрацоўніцы Цэнтральнага штабу партызанскага руху…
Непасрэдных доказаў няма, але шмат якія ўскосныя дадзеныя, храналогія і логіка падзеяў сведчаць менавіта пра забойства Купалы па загадзе Панцеляймона Панамарэнкі, кіраўніка ЦШПД і галоўнага адказнага за хаця б вонкавую «палітычную лаяльнасць» Беларусі перад Масквой.
Размаўляў Аляксандр Гелагаеў, belsat.eu