Дачка экс-прэзідэнта Узбекістану Карымава хоча адмовіцца ад $ 686 млн наўзамен свабоды
Старэйшая дачка памерлага экс-прэзідэнта Узбекістану Гульнара Карымава, якая цяпер адбывае турэмны тэрмін, 25 лютага звярнулася да цяперашняга кіраўніка краіна Шаўката Мірзіяева з просьбай вызваліць яе ў абмен на ейныя актывы.
Ліст Карымавай апублікаваны ў Instagram яе дачкі Іман, якая жыве ў Лондане. Старонку вядзе група адвакатаў.
У лісце Карымава скардзіцца на пераезды з адной турмы ў іншую, а таксама на шматлікія парушэнні Канстытуцыі і Крымінальнага кодэксу падчас следства. Яна сцвярджае, што канфіскаваная маёмасць ейная сям’і коштам 1,2 млрд долараў не была залічаная ў якасці кампенсацыі «нанесенай матэрыяльнай шкоды».
«Дзеля захавання сямʼі і здароўя» яна гатовая адмовіцца ад любых прэтэнзій на грашовыя сродкі (у тым ліку замарожаныя ў Швейцарыі актывы) пры ўмове прыняцця «спрошчанай працэдуры закрыцця справы», то бок без публічнага суда і з перадачай на карысць дзяржавы 686 млн долараў ЗША, піша Карымава. Гэтыя сродкі яна прапануе накіраваць на гуманітарныя праекты – медыцыну, адукацыю і інш.
47-гадовая Карымава таксама скардзіцца на пагаршэнне стану здароўя і сцвярджае, што патрабуе шэрагу аперацыяў.
Гульнара Карымава была абвінавачаная Генеральнай пракуратурай Узбекістану ў здзяйсненні шэрагу цяжкіх злачынстваў, звязаных з крадзяжом бюджэтных сродкаў, вымагальніцтвам і легалізацыяй злачынных актываў за мяжой. Паводле прысуду таемнага суду яна адбывае пакаранне ў жаночай калоніі ў Зангіацінскім раёне Ташкенцкай вобласці.
Па сцвярджэнні самой Карымавай і яе блізкіх, да сённяшняга дня яе судзілі па меншай меры пяць разоў. Адвакаты не ведаюць, колькі дакладна спраў супраць яе распачата.
Паводле дадзеных следства, Карымава атрымала каля $ 1 млрд хабараў ад тэлекамунікацыйных і іншых кампаніяў (МТС, «Вымпелком», ING, Telia Sonera) у абмен на гарантаваную выдачу ліцэнзіяў на мабільную сувязь ва Узбекістане.
КА belsat.eu
