Калі чуюць, што масак няма – разварочваюцца і сыходзяць, кажа «Белсату» правізарка адной з менскіх аптэк.
«Прыкладна да дзясятай раніцы было ўсё спакойна. Як толькі дзесьці з’явілася навіна з парадамі ўжываць септацыд і апранаць маскі, людзі пачалі прыходзіць адзін за другім. Пыталіся, ці ёсць маскі і нешта для дэзынфекцыі. Скупілі нават самыя танныя антыбактэрыяльныя гелі для рук і сурвэткі. Таксама вельмі актыўна скупаюць супрацьвірусныя прэпараты «Рымандацін» і расейскі «Арбідол». Не ведаю, навошта», – кажа Аліна, якая працуе ў адной з менскіх аптэк.
Паводле правізаркі, многія пытаюць пра рэспіратары FFP2 – з большай ступені абароны.
«Калі людзі ў чарзе чуюць, што масак няма, палова людзей разварочваецца і сыходзіць. Я была вымушаная павесіць паперку, што масак няма – і прадубляваць па-ангельску, па-арабску і па-кітайску», – працягвае яна.
Па словах Аліны, маскі зніклі з продажу даўно – як толькі іх пачалі скупаць кітайцы і іншыя замежнікі.
«Калі яны з’явяцца – не ведаю. На нашых складах нічога няма. У апошні месяц як толькі прыходзіла, напрыклад, 80 штук, іх нехта адразу браніруе онлайн і выкупае ўсё адразу. Абмежаванняў па набыцці масак няма: хто паспеў – той і з’еў», – кажа Аліна.
Аптэка, дзе працуе нашая суразмоўца, 28 лютага працягвае працаваць у звычайным рэжыме. Нейкага адмысловага інструктажу па працы ў сувязі з каронавірусам аптэка не ладзіла.
«Я праяўляю асабістую ініцыятыву і чытаю медычныя сродкі інфармацыі. Раю людзям не панікаваць, лепш мыць рукі, карыстацца сродкамі для прамывання носа і не прымаць прэпараты з недаказанай эфектыўнасцю – напрыклад, супрацьвірусныя прэпараты і імунамадулятары. А маску насіць раю ў выпадку, калі вы ўжо захварэлі самі. У якасці прафілактыкі рэкамендую піць гарбату, вітамін C і цынк», – дадае нашая суразмоўца.
ДД belsat.eu