Паводле Міністэрства ўнутраных справаў, інфармацыя пра мінаванні паступіла на электронную пошту кол-цэнтру Магілёўскага аддзялення Беларускай чыгункі.
Пра эвакуацыю гандлёвых цэнтраў «Замак», «Дана Мол», «Галілеа», а таксама Цэнтральнага чыгуначнага вакзалу першым паведаміў Тэлеграм-канал «Работаем с Пушкиным!».
Пазней пракаментавала інфармацыю і прэсавая служба Міністэрства ўнутраных справаў.
«Сёння каля 19:00 на электронную пошту кол-цэнтру Магілёўскага аддзялення Беларускай чыгункі паступіла паведамленне аб небяспецы на аб’ектах у Менску: гандлёвыя цэнтры «Замак», «Дана Мол», «Галілеа», а таксама Цэнтральны чыгуначны вакзал. Сапёрна-піратэхнічныя групы праводзяць абследаванне названых абʼектаў на наяўнасць небяспечных прадметаў. У мэтах выканання мер бяспекі супрацоўнікамі міліцыі будуць прыняты меры да эвакуацыі грамадзянаў. МУС звяртаецца да грамадзянаў не паддавацца паніцы, выконваць меры бяспекі і прытрымлівацца рэкамендацый супрацоўнікаў праваахоўных органаў. У выпадку выяўлення безгаспадарных прадметаў просьба паведамляць па тэлефоне міліцыі».
Гэта не першы раз, калі ў Менску эвакуююць гандлёвыя цэнтры, вакзалы, аэрапорт. Кожны раз паведамленні пра мінаванне прыходзяць на электронную пошту. Дагэтуль праваахоўныя органы не знайшлі, хто рассылае такія паведамленні.
ВЯ Belsat.eu