У магілёўскім парку Падміколле прайшла навагодняя імпрэза – ляпілі фігуры са снегу. З надвор’ем пашанцавала – якраз 5 студзеня Беларусь накрыла снегападам, так што снегу хапіла, каб задаволіць багатую фантазію ўсіх удзельнікаў.
Вы такога яшчэ не бачылі!Чабурашка і свіння на фестывалі снежных скульптураў.Падрабязней: https://naviny.belsat.eu/news/chaburashka-i-svinnya-na-festyvali-snezhnyh-skulpturau-u-magilyove/
Opublikowany przez Белсат TV Niedziela, 6 stycznia 2019
Падвазіць снег для вырабу скульптур, як планавалі раней, не прыйшлося. У Магілёве само надвор’е спрыяла правядзенню фестывалю снежных скульптур.
У ролі скульптараў выступалі супрацоўнікі і вучні магілёўскіх школ.
Кожная каманда ўдзельнікаў працавала над рэалізацыяй уласнай ідэі. Тэматыка была акрэслена вельмі шырока: навагоднія святы і ўсё, што з гэтым звязана.
Школьнікі і іх настаўнікі зляпілі са снегу добра знаёмых герояў: Чабурашку, Калабка, ката, снегавіка і навагоднюю ялінку.
Былі і мала вядомыя персанажы, якіх нават цяжка ўзгадаць. Шмат хто з удзельнікаў прадказальна абраў абʼектам сваёй творчасці сімвал 2019 года – свінню.
Каб лепей былі бачны рысы скульптур, аўтары падкрэслілі іх пры дапамозе фарбаў. Шкада, што бесперапынны снегапад вельмі хутка пакрыў фігуры новым слоем снегу і колеры перасталі быць заўважнымі так, як гэта задумвалася аўтарамі.
Пераможцаў у акцыі не абіралі, але кожнай камандзе ўручылі падзяку за ўдзел.
Колькі прастаяць снежныя фігуры ў магілёўскім парку Падміколле, невядома. Цяпер ідзе моцны снегапад, які лёгка можа ўжо да ранку засыпаць усе скульптуры.
Раней у Падміколлі ўжо рабілі ледзяную рэзідэнцыю Каляднага Дзеда, якая, па словах арганізатараў, магла бы прастаяць у парку да вясны. Але не прастаяла. Ужо праз два тыдні пасля адкрыцця рэзідэнцыі яе элементы пашкодзілі. Цяпер падыход да рэзідэнцыі перакрыты.
Трэба адзначыць, што па ўсім горадзе без усялякага фестывалю людзі самастойна лепяць снежныя скульптуры: свінні з прыходам 2019 года па папулярнасці абагналі нават снегавікоў. Лепка снегу, як асобны від зімовага адпачынку, даступная ўсім і кожнаму. Выхадзі з сябрамі на вуліцу і здзіўляй суседзяў сваёй снежнай скульптурай.
Вольга Васільева, фота аўтара/Belsat.eu
