Фонд салідарнасці абвесціў, што падтрымае адлічаных студэнтаў грашыма і дапаможа ўладкавацца ў замежныя ВНУ і каледжы для працягу навучання. За содні ў BYSOL звярнуліся 30 студэнтаў.
Фонд салідарнасці фінансава падтрымае студэнтаў, адлічаных з універсітэтаў праз сваю грамадзянскую пазіцыю.
«Гэтая сума прывязаная да сярэдняй стыпендыі па краіне. Кожнаму адлічанаму па палітычных прычынах студэнту мы выплацім 200 еўра – гэта прыкладна стыпендыя за 4 месяцы», – распавёў сузаснавальнік фонду Андрэй Стрыжак.
Паводле ягоных словаў, новы кірунак дзейнасці BYSOL не запаволіць выплатаў для тых, хто звяртаецца туды праз страту працы: «Мы не падвышаем нагрузку на верыфікатараў фонду, якія працуюць цяпер, а вылучаем асобную групу, што будзе працаваць толькі са студэнтамі. Мы будзем намагацца рабіць гэтыя выплаты яшчэ хутчэй».
Акрамя фінансавага падтрымання фонд таксама абяцае дапамагчы маладзёнам працягнуць навучанне. Цяпер гатовыя прыняць новых навучэнцаў Віленскі ўніверсітэт, ЕГУ, універсітэты ў Латвіі і Славаччыне, а таксама аднавілася польская праграма Каліноўскага. Ідуць перамовы і з ВНУ паўночных краін ЕЗ.
«Мы памятаем 2006 і 2010 гады, калі ў Беларусі былі моцныя рэпрэсіі супраць маладых людзей і шмат хто з’ехаў з краіны вучыцца і далучыўся да нашай дыяспары за мяжой, якая шмат што зараз робіць, каб падтрымаць суайчыннікаў. Але так ці іначай гэтыя людзі не вярнуліся ў Беларусь», – падкрэсліў Стрыжак. – «Нашая галоўная задача – падтрымаць, а не вымыць людзей з краіны, перанёсшы іх кудысьці, пакінуць іх удома. У 21-м стагоддзі ёсць усе неабходныя ўмовы для дыстанцыйнага навучання, тым больш праз пандэмію шмат якія ўстановы перайшлі ці пераходзяць на онлайнавае выкладанне. Таму, калі чалавеку не пагражае крымінальная справа, яму няма ніякага сэнсу ехаць у тую ж Вільню і сядзець там у інтэрнаце, калі онлайнава ён можа навучацца і з дому. Хаця гэта патрабуе большай самаарганізацыі, вядома».
Як студэнтаў будуць прымаць ВНУ – залежыць ад спецыяльнасці і ўстановы, дзе чалавек вырашыць працягнуць навучанне.
Перад тым, як аказаць дапамогу, чалавека, які звярнуўся ў фонд, правяраюць. «Мы працуем не толькі праз уласную форму, але і праз нашых партнёраў. У нас ёсць вельмі важны момант верыфікацыі – праверка, што чалавек, які звярнуўся да нас, пацярпеў і быў адлічаны менавіта праз сваю палітычную актыўнасць. Бо наша праграма – гэта не інструмент для любога ахвочага з’ехаць за мяжу. Зараз у нас 30 зваротаў», – патлумачыў сузаснавальнік фонду.
Андрэй Стрыжак падкрэсліў, што гэта ўсё робіцца для таго, каб студэнты не адчувалі сябе пакінутымі: «Мы цалкам падтрымліваем усіх студэнтаў, якія зараз выходзяць на пратэсты. Каб яны разумелі, што за імі вялікая грамада, якая падтрымлівае іх. І ад таго, наколькі мы ўсе зараз будзем актыўныя, залежыць, як хутка Беларусь стане дэмакратычнай дзяржавай».
МГ belsat.eu