Пасля выхаду Расеі са здзелкі OPEC+ Саудаўская Аравія звярнулася да спажыўцоў расейскай нафты Urals, паведамляе «Reuters». Сярод патэнцыйных пакупнікоў ёсць і Беларусь.
Нафтаздабываючая кампанія «Saudi Aramco» плануе пастаўляць на еўрапейскі рынак каля 4,2 млн барэляў нафты штодня (па $ 25 за барэль), паведаміла агенцтву «Reuters» крыніца, якая працуе на міжнародны гандлёвы дом.
«Яны стукаюць ва ўсе дзверы: бярыце танна і шмат. Яны размаўляюць з усімі пакупнікамі (Urals)», – распавяла «Reuters» крыніца з буйной нафтавай кампаніі, якая працуе на еўрапейскім рынку.
Прапанова Саудаўскай Аравіі можа зацікавіць нават такіх традыцыйных спажыўцоў Urals, як Беларусь, піша «Reuters».
«Мы ўжо даўно працуем у гэтым кірунку… Мы з саўдзітамі ў Лондане сустракаліся… Цяпер кошты ў іх проста выдатныя», – сказала агенцтву крыніца ў Беларусі.
Напрыканцы мінулага тыдня краіны ОРЕС+ не здолелі дамовіцца з Расеяй аб скарачэнні здабычы нафты, што абваліла курс расейскага рубля і кошты на нафту. Прэс-сакратар кампаніі «Роснефть» Міхаіл Лявонцьеў заявіў, што пагадненне не адпавядала інтарэсам Расеі.
ЮВ belsat.eu
