Сёння, 30 ліпеня, у выпуску вечаровых навінаў па БТ паказалі падрабязнасці гучнай справы затрыманых баевікоў ПВК «Вагнер».
У вечаровых навінах па БТ паказалі новыя падрабязнасці рэзананснай справы затрыманых баевікоў. У сюжэце сцвярджаецца, што больш за 200 баевікоў прыбылі ў Беларусь, каб арганізаваць масавыя закалоты, пры падтрыманні Сяргея Ціханоўскага і Мікалая Статкевіча.
Напачатку сюжэту вядоўца прыгадаў сённяшнюю сустрэчу кандыдатаў у ЦВК. Ён падкрэсліў, што праз пагрозу правілы бяспекі на мітынгах сталі больш жорсткімі. У відэа падкрэсліваецца, што пры затрыманні баевікі паводзілі сябе спакойна.
Яшчэ раз прыгадалі імёны і пашпартныя дадзеныя затрыманых. Тое, што баевікі – грамадзяне Расеі пацвердзіў Дзмітрый Пяскоў – аўдыязапіс тэлефоннай размовы паказалі ў эфіры.
«Адсутнічае інфармацыя аб супрацьпраўных дзеяннях расейцаў, якія маглі б стаць прычынаю для затрымання. Нам пра гэта нічога не вядома», – паведаміў Пяскоў.
У сюжэце згадваюцца версіі пра тое, што баевікі накіроўваліся ў трэція краіны – іх называюць «канспіралагічнымі тэорыямі».
«У дачыненні да Статкевіча і Ціханоўскага заведзеныя крымінальная справа па факту арганізацыі масавых закалотаў. Учора паводле інфармацыі, атрыманых ад спецслужбаў, па падазрэнні ў здзяйсненні дадзенага злачынства, затрыманыя 33 грамадзяніна РФ», – паведаміў БТ Аляксей Волкаў, першы намеснік старшыні Следчага камітэту.
Таксама па БТ прыгадалі, што на Сяргея Ціханоўскага заведзеныя крымінальныя справы па распальванні сацыяльнай варожасці, заклікаў да здзяйснення гвалтоўна-агрэсіўных дзеянняў у адносінах да супрацоўнікаў праваахоўных органаў.
Зараз у амбасадара Расеі запрасілі тлумачэнні датычна знаходжання ў Беларусі вайскоўцаў. Таксама ўзмацняецца кантроль на межах, а Следчы камітэт працягвае расследаванне справы.
30 ліпеня дзяржсакратар Савету Бяспекі Андрэй Раўкоў заявіў, што ў Беларусь прыбылі больш за 200 баевікоў для дэстабілізацыі абстаноўкі ў перыяд выбарчай кампаніі.
КТ belsat.eu