Брытанец распавёў падрабязнасці атручвання «Навічком» у Эймсберы


Пацярпелы ад "Навічка" Чарлі Роўлі, news.com.au

Чарлі Роўлі распавёў, што знайшоў запячатаную скрынку ад парфумы, якую вырашыў падараваць сваёй сяброўцы Дон Стэрджэс, для якой атручванне «Навічком» стала смяротным.

Раней Роўлі трапіў у шпіталь у выніку атручвання нервова-паралітычным рэчывам «Навічок» у горадзе Эймсберы. За пару дзён да таго ён знайшоў на вуліцы запячатаную скрынку з парфумай. Знаходку Роўлі вырашыў паднесці ў якасці прэзента сваёй сужыцельцы Дон Стэрджэс. Пра гэта брытанец распавёў у інтэрв’ю тэлеканалу ITV.

Пасля таго, як жанчына распыліла змесціва флакона на запясці, пара адчула сябе блага.

«Недзе праз 15 хвілін Дон паскардзілася на галаўны боль, і спытала, ці ёсць у мяне таблеткі. Пакуль я аглядаў кватэру яна сказала, што адчувае сябе дзіўна і павінна легчы ў ванну, што мне тады здалося трохі дзіўным. Я ўвайшоў у ванны пакой і знайшоў яе ў ванне, цалкам апранутую, у вельмі хворым стане», – распавёў Роўлі.

Паводле яго слоў, ён не мог падумаць, што ў запячатанай скрынцы можа знаходзіцца нешта нелегальнае або небяспечнае.

«Страшна падумаць, што нешта можа быць замаскіравана такім чынам і пакінута для публікі», – сказаў брытанец.

Роўлі таксама адзначыў, што рэчыва ў бутэльцы мела алеістую структуру і зусім не пахла духамі.

***

30 чэрвеня ў горадзе Эймсберы, недалёка ад Солсберы, дзе знайшлі атручанымі Сяргея і Юлію Скрыпалей, былі выяўленыя без прытомнасці 44-гадовая Дон Стэрджэс і 45-гадовы Чарлі Роўлі. 9 ліпеня жанчына памерла ў лякарні, стан мужчыны заставаўся цяжкім, аднак 10 ліпеня ён прыйшоў у сябе. Паводле дадзеных паліцыі, пацярпелыя былі атручаны нервова-паралітычным рэчывам «Навічок». Брытанская паліцыя займаецца расследаваннем інцыдэнту.

КА, belsat.eu

Глядзі таксама
Каментары