Сёння ў Берасці судзілі журналістаў і праціўнікаў будоўлі акумулятарнага заводу. Юлію Нічыпарук прызналі вінаватаю ў парушэнні арганізацыі правядзення масавых мерапрыемстваў (арт. 23.34 КаАП РБ) і пакаралі штрафам на 1 базавую велічыню. Іронія ў тым, што Юлію пакаралі за снежную бабу, якую зляпілі ейныя дзеці.
5 студзеня ў гадавіну пратэстаў супраць будоўлі акумулятарнага заводу актывісты прыехалі да прадпрыемства, каб адзначыць гэтую падзею. Некаторыя ўзялі з сабою дзяцей, і тыя зляпілі снежных баб. Для берасцейкі Юліі Нічыпарук забава скончылася адміністратыўным пратаколам, яго склалі ў міліцыі Берасцейскага раёну. А 30 студзеня суддзя Сяргей Маручак пастанавіў, што стварэнне снежнай бабы падпадае пад артыкул 23.34 КаАП РБ і прысудзіў Юліі штраф памерам 25,5 рублёў.
«Да апошняга верыла, што мяне апраўдаюць, але цуду не здарылася. Для мяне дзіўна, што ў нашай краіне пераследуюцца любыя выказванні, людзям не даюць выказаць свайго меркавання. Хоць мы нічога не рабілі, не скандавалі ніякіх лозунгаў, нічога не дэманстравалі, хоць маем на гэта права, але ў выніку штраф. Але я адчула велізарнае падтрыманне людзей», – распавяла Юлія «Белсату».
У сваю чаргу журналістаў Алеся Леўчука і Мілану Харытонаву, якія асвятляюць пратэсты, пакаралі штрафам на 2550 рублёў. Рашэнне агучыў у судзе Ленінскага раёну Берасця суддзя Дзмітрый Шурын.
«Нас з Міланаю Харытонаваю павінныя былі судзіць яшчэ 25 студзеня, але нешта ў іх пайшло не так, таму працэс перанеслі на 30 студзеня, нас судзілі адразу паводле чатырох пратаколаў, за тое, што мы асвятляем пратэст супраць будаўніцтва акумулятарнага заводу», – заявіў Алесь Ляўчук «Белсату.
Толькі ў гэтым месяцы суддзя Дзмітрый Шурын аштрафаваў Алеся Леўчука і Мілану Харытонаву на 2400 долараў, а іхны агульны штраф за апошнія месяцы наблізіўся да 8000 долараў. Журналісты не бяруць удзелу ў судовых паседжаннях, бо ўпэўненыя, што гэта палітычная замова з вядомым вынікам.
АС belsat.eu
