Грузавы самалёт «Boeing-747» разбіўся пры заходзе на пасадку побач з аэрапортам Манас. Міністэрства аховы здароўя Кыргызстану паведамляе, што колькасць загінулых дасягае 37 асобаў.
Яшчэ восем чалавек, у тым ліку шасцёра дзяцей, дастаўлены ў лякарні Бішкеку.
Сёння ў 7.10 у вёсцы Дача-Суу Сакулукскім раёна Чуйскай вобласці на жылыя дамы ўпаў грузавы самалёт турэцкіх авіялініяў.
На месцы крушэння самалёта вядуцца аварыйна-ратавальныя працы. Самалёт упаў у 1,5-2 кіламетрах ад узлётна-пасадачнага пасу аэрапорту «Манас». 32 дамы былі пашкоджаныя або цалкам знішчаныя.
Грузавы самалёт «Boeing-747» належыў кампаніі «MyCargo/ACT Airlines» і быў зафрахтаваны «Turkish Airlines» ды выконваў рэйс Ганконг – Бішкек – Стамбул. Экіпаж самалёту складаўся з пяці асобаў.
Створаная адмысловая камісія, якая будзе расследаваць акалічнасці трагедыі. Генпракуратура Кыргызстану завяла крымінальную справу. Як заявіў першы віцэ-прэм’ер Кіргізіі Мухамметкалый Абулгазіеў, да катастрофы магла прывесці памылка пілотаў. Пры гэтым ён падкрэсліў, што экіпаж самалёта быў дасведчаным.
Прэзідэнт Кыргызстана Алмазбек Атамбаеў даручыў МНС аказаць усю неабходную дапамогу сем’ям загінулых і пацярпелым у выніку авіякатастрофы і актывізаваць працу ратавальнікаў у раёне крушэння самалёта для ліквідацыі наступстваў трагедыі.
Мэрыя Бішкеку адкрыла пункт прыёму дапамогі ахвярам. Паводле tass.ru, аўторак, 17 студзеня, абвешчаны ў Кіргізіі днём жалобы.
Паводле kabar.kg, міністр надзвычайных сітуацыяў Кубатбек Баронаў далажыў, што ратавальнікі знайшлі 9 фрагментаў чалавечых целаў. З месца крушэння «Боінга 747-400» пад Бішкекам пачалі вывозіць целы загінулых.
Па дадзеных Міністэрства аховы здароўя Кыргызскай Рэспублікі, у моргу РЦСМЭ апазнаныя 15 целаў тых, хто загінуў у выніку авіяцыйнай катастрофы. З іх пяцёра дзяцей, паведамляе kabar.kg.
Сайт турэцкае газеты gazetevatan.com апублікаваў імёны членаў экіпажа, якія загінулі пры падзенні грузавога самалёта «Боінг 747-400» бліз аэрапорту Бішкека.
Камандзірам Boeing-747 быў Ібрагім Гюрган Дзіранч, другім пілотам – Казым Ондюл. Таксама ў склад экіпажа ўваходзілі борт-аператары па размяшчэнні грузаў Аслан і Коча Меліхавы. Ондюл, раней быў ваенным лётчыкам і служыў у Афганістане ў 2009 годзе.
Спецыялісты знайшлі адзін з бартавых самапісцаў самалёту, які разбіўся.
«Заўтра прыбудуць спецыялісты з Масквы і павязуць яго для расшыфроўкі. Даведацца, што там захоўваецца, атрымаецца няхутка », – адзначыў міністр надзвычайных сітуацыяў Кыргызстана.
Пошукі другога працягваюцца, паведамляе tass.ru.
МЛ, belsat.eu