Суд Савецкага раёну Гомля 18 траўня асудзіў блогера Сяргея Ціханоўскага, які адбывае 15-дзённы арышт у ІЧУ Гомля, яшчэ на 15 содняў арышту. Пра гэта паведамляе TUT.BY са спасылкай на канцылярыю суда.
15 содняў блогеру прысудзілі за адміністрацыйнае правапарушэнне, але за якое менавіта – невядома.
На волю Сяргей Ціханоўскі выйдзе толькі 5 чэрвеня.
Блогера Сяргея Ціханоўскага затрымалі 6 траўня пасля арганізаванай ім сустрэчы на вуліцах Магілёва. Яго пасадзілі на 15 содняў паводле ранейшага адміністрацыйнага прысуду, верагодна, за ўдзел у пратэстах супраць інтэграцыі з Расеяй.
Ужо пасля арышту выйшла відэа, у якім блогер абвясціў пра свой удзел у прэзідэнцкіх выбарах. Але ЦВК адмовіў у рэгістрацыі ягонай ініцыятыўнай групе. У выніку прынялі рашэнне падаць дакументы на рэгістрацыю ІГ ягонай жонкі.
МГ Belsat.eu
