Блогер Сцяпан Святлоў, які вядзе Тэлеграм-канал «Nexta», у каментары «Белсату» адказаў на заўвагу прадстаўнікоў Следчага камітэту.
«Незразумела пра якія каналы вядзецца гаворка, бо, ў нашым, напрыклад, ні разу не пісалася нічога пра «вобласць пахвіны». Нягледзячы нават на тое, што такія версіі ўзмоцнена злівалі, – заявіў блогер. – Па-другое, інфармацыя пра «Волгу», ромаў і здымак з месца трагедыі былі атрыманыя з розных, незалежных адна ад другой, крыніцаў».
«А вось на пытанне пра зашпіленыя кайданкі СК гэтак і не адказаў. Якім чынам яны былі зашпіленыя і навошта? Навошта трэба было спальваць штаны?», – пытаецца блогер у сваім канале.
Закід у бок «некаторых Telegram-каналаў» СК зрабіў 20 траўня пасля прэсавай канферэнцыі па справе загінулага інспектара ДАІ Яўгена Патаповіча.
«Мужчына не меў ніякіх раненняў у вобласці пахвіны: кроў на ніжнім бялізну апынулася там з-за паставы. Адзінае зафіксаванае цялеснае пашкоджанне – агнястрэльнае раненне ў галаву. Інфармацыя, якая распаўсюджваецца на асобных Telegram-каналах, з’яўляецца недакладнай. Дрэнная якасць і ракурс фота дазваляюць раскручваць гэтую «версію», бо іх аўтары разумеюць, што здымак буйным планам не будзе апублікаваны па этычных меркаваннях», – дадаюць следчыя.
Тэлеграм-канал «Nexta» быў першым, хто паведаміў пра знікненне, а пазней – смерць міліцыянта на Магілёўшчыне. На апублікаваным блогерам здымку бачна, што загінулы міліцыянт быў без штаноў, а майткі былі ў крыві.
ДД belsat.eu