Блогер Аляксандр Лапшын пакінуў Азербайджан.
Пра гэта раніцай 14 верасня паведаміла інфармацыйнае агенцтва «АПА».
Разам з маці Бэлай Лапшыной блогер вылецеў з міжнароднага аэрапорту Гейдар Аліеў у Ізраіль рэйсам Баку- Тэль-Авів.
11 верасня прэзідэнт Азербайджану Ільхам Аліеў падпісаў распараджэнне аб памілаванні Аляксандра Лапшына, асуджанага на 3 гады пазбаўлення волі.
Азербайджанскія ўлады абвінавачвалі Лапшына ў парушэнні закона аб дзяржаўнай мяжы. Лапшын трапіў у «чорны спіс» за наведванне Нагорна-карабахскай рэспублікі без узгаднення з уладамі.
Аляксандра Лапшына затрымалі ў Менску ў снежні 2016 году і сёлета ў лютым экстрадавалі ў Азербайджан, за што прэзідэнт Ільхам Аліеў падзякаваў Лукашэнку ў тэлефоннай размове 8 лютага.
Тады азербайджанскі бок заклікаў міжнародную супольнасць не палітызаваць справу Лапшына, які з’яўляецца грамадзянінам Расеі, Ізраілю ды Украіны. Аднак МЗС Расеі і парламент Арменіі выказвалі сваю незадаволенасць экстрадыцыяй блогера.