Блогер і палітвязень Ігар Лосік абвесціў бестэрміновую галадоўку. Ягоная жонка далучылася на знак салідарнасці
15 снежня Ігар Лосік, які знаходзіцца ў турме ў Жодзіна, абвесціў галадоўку. Ён стаў фігурантам новай крымінальнай справы. Пра гэта паведаміў блогер Антон Матолька. Дар’я Лосік, жонка Ігара, напісала ў сваім Instagram, што на знак салідарнасці з мужам таксама абвяшчае галадоўку.
25 снежня мусіў завершыцца тэрмін ўтрымання Ігара пад вартай. Але яму высунулі новыя абвінавачванні. Цяпер справа распачатая ня толькі на падставе ч. 1 арт. 342 Крымінальнага кодэксу («Падрыхтоўка да парушэння грамадскага парадку»), але і паводле арт. 13 ч. 2 арт. 293 («Падрыхтоўка да ўдзелу ў масавых беспарадках»).
Ігар Лосік сваю віну не прызнаў і адрэагаваў на новы ціск аб’яўленнем бестэрміновай галадоўкі да зняцця ўсіх абвінавачванняў або змены меры стрымання.
Ён лічыць свой крымінальны пераслед палітычна матываваным. Праваабаронцы лічаць так жа, яны прызналі Ігара Лосіка палітычным вязнем.
У лістах знаёмым Ігар пісаў, што ніякія следчыя дзеянні з ім не праводзяць. «Такое адчуванне, што проста «мурыжаць», – паведамляў ён.
Дар’я Лосік, жонка Ігара, напісала ў сваім Instagram, што на знак салідарнасці далучаецца да галадоўкі.
«Супраць нашай сям’і абʼяўлены генацыд, што вымушае нас ісці на крайнія меры», – напісала яна.
Адміністратар папулярнага тэлеграм-каналу «Беларусь галаўнога мозгу» Ігар Лосік быў затрыманы 25 чэрвеня 2020 года пасля вобшуку ў ягонай кватэры ў Баранавічах.
АВ, belsat.eu
