Роўна два гады кожную нядзелю ад некалькі дзясяткаў да некалькі соцень людзей збіраецца ў цэнтры Берасця, каб пакарміць галубоў і такім чынам выказаць пратэст супраць акумулятарнага заводу недалёка ад гораду.
У нядзелю, 23 лютага, на галоўнай плошчы Берасця сабралася, па словах праваабаронцы Рамана Кісляка, 120 чалавек. Удзельнікі акцыі патрабуюць поўнага закрыцця заводу па вытворчасці акумулятарных батарэяў «АйПаўэр».
Цяпер завод знаходзіцца ў стадыі кансервацыі, якая мае працягнуцца да 31 сакавіка.
Уладальнікі прадпрыемства шукаюць шляхі, каб атрымаць дазвол на працу, а праціўнікі заводу робяць усё магчымае, каб шкодная, на іхную думку, вытворчасць не запрацавала ніколі.
Паводле удзельнікаў нядзельных сустрэчаў, найважнейшым вынікам дзвюхгадовых акцыяў пратэсту сталі змены ў свядомасці жыхароў гораду.
«Завод не працуе дзякуючы ўсёй групе [людзей] пад назвай берасцейцы», – сказаў «Белсату» адзін з лідараў пратэсту Дзмітрый Бекалюк.
Будаўніцтва акумулятарнага заводу ў Свабоднай эканамічнай зоне «Берасце» пачалося ў канцы 2017 году. Яго планавалі запусціць спачатку ў 2018-м, пазней – у 2019 годзе.
Ад пачатку 2018 году берасцейцы пратэстуюць супраць працы заводу. Яны лічаць, што выкіды свінцу, большыя за дапушчальныя нормы, пагражаюць здароўю мясцовага насельніцтва. Пратэстоўцы сабралі і накіравалі ў Адміністрацыю прэзідэнта 37 тысяч подпісаў з просьбай з просьбай спыніць будаўніцтва.
У сярэдзіне чэрвеня мінулага году старшыня Берасцейскага аблвыканкаму Анатоль Ліс падпісаў распараджэнне аб прыпыненні будаўніцтва заводу, а кіраўніцтва кампаніі апынулася за кратамі. Пазней, аднак, завод прайшоў экалагічную экспертызу і распачаў працу.
Напрыканцы студзеня 2020 года кіраўніцтва кампаніі распачало працэдуру кансервацыі заводу на час правядзення экалагічнай экспертызы на прадмет уздзеяння вытворчасці на навакольнае асяроддзе.
АС belsat.eu
