У пятніцу, 15 траўня, у судзе Ленінскага раёну Берасця паўторна судзілі праваабаронцу Уладзіміра Вялічкіна і актывіста Юрыя Калько, якому пры затрыманні зламалі палец. Абодва атрымалі штрафы па 30 базавых велічыняў (Br 810 рублёў). Агульны штраф праціўнікаў заводу на гэтым тыдні склаў Br 14 010.
Улады вельмі напалоханыя
Уладзіміра Вялічкіна людзі ў цывільным схапілі ў нядзелю 10 траўня. Праваабаронца лічыць затрыманне ў такой форме выкраданнем. Апошнія шэсць дзён ён правёў в ІЧУ. І толькі 15 траўня пасля суда яго вызвалілі з рахункам – Br 2160 на карысць дзяржавы, абвінаваціўшы ва ўдзеле ў несанкцыянаваных акцыях.
«Наколькі ва ўладаў хапае інтэлекту, каб ацаніць сітуацыю, гэтак яны і дзейнічаюць. У іх нават няма ніякіх доказаў, што мы з Раманам Кісляком удзельнічалі ў згаданых акцыях. На ўсіх матэрыялах бачна, што мы не пратэстуем, а працуем як праваабаронцы: маніторым выкананне правоў чалавека. Тым не менш я атрымаў агулам 80 базавых штрафу, з гэтаю пастановаю не згодны, і калі спатрэбіцца – дайду ў абскарджанні да Камітэту па правах чалавека ААН, – папярэдзіў Уладзімір Вялічкін.
Спадар Вялічкін мяркуе, што хвалю рэпрэсіяў у дачыненні да праваабаронцаў і актывістаў выклікаў чынавенскі страх перад гараджанамі.
«Галоўная прычына гэтых рэпрэсіяў – не дазволіць людзям стаць удзельнікамі выбараў у якасці кандыдатаў і напалохаць грамадзянаў, каб яны не заміналі Лукашэнку пераабрацца на чарговы тэрмін. Я бачу страх дзейнай улады. Яны баяцца, што вельмі хутка ім прыйдзецца адказваць за тое, што яны нарабілі», – адзначае праваабаронца.
Праціўнікі акумулятарнага заводу не планавалі ўдзелу ў выбарах
Іншы праваабаронца Раман Кісляк, таксама быў затрыманы 10 траўня пасля традыцыйнай нядзельнай акцыі – «кармлення галубоў» у Берасці. Ён правёў пад арыштам пяць дзён, наперадзе Рамана чакае суд. Ісці на выбары ў якасці кандыдата Кісляка натхніла сітуацыя. Адпаведную заяву ён падаў з ізалятару. У размове з «Белсатам» Раман патлумачыў:
«Праціўнікі акумулятарнага заводу не планавалі ўдзельнічаць у прэзідэнцкіх выбарах і вылучаць свайго кандыдата. Але ўлады намяшалі, зладзіўшы гэткі хапун. Каб гэта спыніць і падняць стаўкі, я зрабіў заяву аб удзеле ў выбарах. Аднак я не ведаў, што адбываецца на волі. Нашая каманда не хоча ўдзельнічаць у прэзідэнцкіх выбарах. Калі б хацела, мы б за два дні сабралі ініцыятыўную групу.
Праваабаронца назваў меркаваныя прычыны травеньскай хвалі рэпрэсіяў супраць руху праціўнікаў акумулятарнага заводу.
«Улады вырашалі некалькі задач: і запалохаць, і хвалю збіць, і перашкодзіць блогерам і праціўнікам заводу прыняць удзел у выбарах. Яны меркавалі, што мы вылучым кандыдата, але не ведалі, каго, таму хапалі ўсіх. І яны памыліліся. Рэпрэсіі толькі ўзмоцняць рашучасць людзей закрыць завод», – адзначае суразмоўца.
Гэтыя рэпрэсіі паказалі берасцейцам, як функцыянуюць праваахоўныя органы. Яны выкрадаюць людзей, здзекуюцца, трымаюць ізаляванымі больш за дазволены час, хлусяць у судах. На думку Кісляка, уладам не ўдасца гэткім чынам спыніць берасцейскі пратэст.
«Людзі навучыліся самаарганізоўвацца. Калі большасць лідараў пратэсту ізалявалі, іншыя асобы арганізавалі назіранне ў судах, дастаўку дапамогі сваякам, збіранне перадач. Яны паказалі высокую ступень грамадзянскай арганізацыі і волю да дасягнення мэты і перамогі», – падсумоўвае Раман Кісляк.
АС Belsat.eu
