Супрацоўнікі праваахоўных органаў Беларусі пад Менскам затрымалі баевікоў расейскай прыватнай вайсковай кампаніі «Вагнэр», паведамляе БелТА.
Паводле выдання, у Беларусь прыбылі больш за 200 баевікоў для дэстабілізацыі абстаноўкі ў перыяд выбарчай кампаніі. Пры сабе расейцы мелі кожны па невялікай ручной паклажы, і на ўсіх – тры вялікія цяжкіх валізкі, загружалі якія ў транспартны сродак некалькі мужчын.
Па прыбыцці ў Менск ў ноч з 24 на 25 ліпеня група засялілася ў адну з гасцініц Менску і павінна была выселіцца 25 ліпеня, аднак пакінула гатэль 27 ліпеня, пераехаўшы ў адзін з санаторыяў Менскага раёна.
У санаторыі расейцы звярнулі на сябе ўвагу нехарактэрным для расейскіх турыстаў паводзінамі і аднастайным адзеннем ў стылі мілітары: спіртнога не ўжывалі, забаўляльных устаноў не наведвалі, трымаліся адасоблена, імкнучыся не прыцягваць да сябе ўвагі. Яны невялікімі групамі ўважліва вывучылі тэрыторыю і асяроддзе санаторыя.
29 ліпеня ноччу 32 чалавекі сіламі групы “А” КДБ пры падтрымцы АМАП ГУУС Мінгарвыканкама былі затрыманыя. Яшчэ адзін чалавек быў знойдзены і затрыманы на поўдні краіны.
Спіс затрыманых:
Увечары стала вядома, што Аляксандр Лукашэнка збірае тэрміновую нараду з чальцам Савету Бяспекі.
Відэа затрымання баевікоў паказалі па «Беларусь 1».
У спісе – 33 мужчыны 1965-1992 гадоў нараджэння. Выданне Nexta звярнула ўвагу, што многія найміты знаходзяцца ў базе «Міратворца». Тэлеграм-канал «Беларусь галаўнога мозгу» адзначае, што некаторыя людзі са спісу былі ўнесеныя ў базу гадзіну таму, а дадаў іх той жа карыстальнік, што і Сяргея Ціханоўскага некалькі дзён таму.
Былы намеснік камандзіра батальёна спецназа арміі «ДНР» пісьменнік Захар Прылепін пацвердзіў URA.RU, што сярод затрыманых у Беларусі расейцаў ёсць яго байцы.
«Ёсць там два ці тры байцы з майго батальёна. Уласна, калі не дзясяткі, то сотні людзей працуюць у ПВК і ўдзельнічаюць у баявых канфліктах», – паведаміў Прылепін.
Ён адмаўляе, што найміты знаходзіліся ў Менску з мэтай дэстабілізаваць сітуацыю ў Беларусі. Паводле яго, са сталіцы байцы адпраўляліся ў іншыя кропкі свету.
Тэлеграм-канал WarGonzo са спасылкай на крыніцы ў расейскіх спецслужбах таксама паведамляе, што Менск выкарыстоўваўся як транспартны хаб падчас пандэміі каронавіруса для перакідання байцоў ПВК «Вагнэр» у іншыя краіны – «пераважна, афрыканскія».
«Натуральна, беларускія спецслужбы былі загадзя ў курсе і папярэджаныя, а па факце забяспечвалі спакойны працэс у перыяд пандэміі перакідання нашых байцоў на ўсходнія франты. Дамоўленасці аб гэтым транспартным калідоры былі дасягнутыя на самым высокім узроўні і Лукашэнка, вядома, быў у курсе, для чаго вагнэраўцы знаходзяцца ў Менску і куды ляцяць», – піша WarGonzo.
Сястра Андрэя Бакуновіча, якога затрымалі на поўдні краіны, паведаміла «Белсату», што яе брат ужо некалькі гадоў жыве ў Беларусі. Яго затрымалі ў Калінкавічах ва ўласным доме.
«Ён даўно жыве ў Беларусі! Яго сын маленькі, трох гадоў. Ён жыве ў Беларусі тры ці чатыры гады. Ён быў у сваім доме. Яны прыйшлі і забралі яго ў жонкі і дзяцей. Мы наагул не зразумелі, што адбываецца», – распавяла Вольга Бакуновіч.
Нагадаем, што падчас «антыдармаедскіх» пратэстаў 2017 года ў межах так званай «Справы патрыётаў» былі затрыманыя 35 чалавек паводле абвінавачання ў навучанні і падрыхтоўцы да масавых беспарадкаў, а пасля яшчэ і ў стварэнні незаконнага ўзброенага фармавання.
Праз паўгода справа была зачыненая, а затрыманых вызвалілі праз некалькі месяцаў пасля сканчэння пратэстаў.
Паводле міжнародных расследавальнікаў, «вагнэраўцы» у рэжыме сакрэтнасці падпарадкоўваюцца штабу ГРУ, то бок Мінабароны Расеі. Яны ўдзельнічалі ў захопе Крыму 5 гадоў таму, працягваюць ваяваць на расейскім баку ў Данецкай і Луганскай вобласцях і ў Сірыі. Гэтую вайсковую групу заўважылі ў Судане і Цэнтральнаафрыканскай Рэспубліцы, дзе забілі трох расейскіх журналістаў, якія расследавалі дзеянні «вагнэраўцаў». Таксама ў паслужным спісе – Емен, Лівія і Венесуэла.
МГ/НЯ belsat.eu