«Белсат» правёў стрым з Менску. З-за антыпарада ў Бабруйску палову гораду заблакавалі
9 траўня тэлеканал «Белсат» вёў онлайн-трансляцыю з параду да Дня Перамогі ў Менску. Зладзіць стрым з антыпараду ў Бабруйску не ўдалося – нашага аператара затрымалі ў Мар’інай Горцы.
12:29 (Мар’іна Горка) Аператара «Белсату» Аляксандра Баразенку выпусцілі. Паводле яго, супрацоўнікі ДАІ спынілі машыну, якой ён кіраваў, каб праверыць, ці не знаходзіцца аўто ва ўгоне. Даішнікаў не задавальняў vin-нумар машыны. Машыну аддалі, узялі тлумачэнні.
12:17 (Бабруйск) На вуліцы Інтэрнацыянальная стаіць калона аўтамабіляў. Усе сігналяць. Раней у мясцовых Telegram-чатах абмяркоўвалася прапанова зладзіць альтэрнатыву антыпараду на вуліцы Менскай – карыстальнікі прапаноўвалі ездзіць па горадзе і сігналіць.
11:59 (Менск) Падчас параду адзін з жаўнераў страціў прытомнасць.
11:45 (Менск) У сваёй прамове на парадзе 9 траўня Аляксандр Лукашэнка заявіў, што Беларусь не магла адмяніць святочныя мерапрыемствы да Дня Перамогі.
11:40 (Бабруйск) Уздоўж вуліцы Менскай у Бабруйску стаяць патрулі ДАІ.
11:30 (Менск) Калона вайсковай тэхнікі праехала па праспекце Машэрава.
11:10 (Менск) Трыбуны, куды можна было трапіць па білетах, запоўненыя.
11:00 (Бабруйск) У Telegram-чаце «Бобруйск для жизни» карыстальнікі паведамляюць, што на пад’ездзе да вуліцы, дзе была запланаваная акцыя Сяргея Ціханоўскага, стаяць патрулі ДАІ. Паводле бабруйскай карэспандэнткі «Белсату» Марыны Малчанавай, вуліца Менская цалкам перакрытая.
Антыпарад у Бабруйску ініцыяваў блогер
Пасля афіцыйнага параду «Белсат» планаваў паказаць антыпарад у Бабруйску, які хацелі арганізаваць паплечнікі блогера Сяргея Ціханоўскага.
«А 12-й гадзіне актывісты выставяць уздоўж вуліцы Менскай свае аўтамабілі з уключаным сігналам аварыйкі і гукавым сігналам, па абодвух баках вуліцы», – абвесціў блогер на сваім YouTube-канале.
На жаль, міліцыянты затрымалі ў Мар’інай Горцы нашага аператара і мы не змаглі паказаць вам акцыю Сяргея Ціханоўскага. Акрамя таго, месца правядзення антыпараду заблакавалі супрацоўнікі ДАІ.
ЮВ, КА belsat.eu
