Пікет па зборы подпісаў за Святлану Ціханоўскую ў Жодзіна. Пасля стрыму затрымалі журналістаў «Белсату»
У Жодзіна ініцыятыўная група Святланы Ціханоўскай 5 чэрвеня ладзіць збор подпісаў за вылучэнне яе ў кандыдаты ў прэзідэнты.
«Белсат» распачаў стрым а 15:30. Памятайце, што ў нас вы пабачыце самыя цікавыя моманты гэтай выбарчай кампаніі.
Дзясяткі людзей сабраліся на пікет Святланы Ціханоўскай у Жодзіна. Побач збіраюць подпісы і за іншых прэтэндэнтаў у кандыдаты. Сярод ініцыятыўных групаў ёсць стэнды Віктара Бабарыкі і Валерыя Цапкалы.
Гараджане наракаюць на нізкія заробкі і кажуць, што жадаюць пераменаў у краіне. Многія ставяць подпісы адразу ж за некалькіх прэтэндэнтаў.
Пасля стрыму з пікетаў у гэтым горадзе затрымалі журналістаў «Белсату».
Супрацоўнікі ДАІ спынілі аўта ў якім з Жодзіна ў Менск вярталіся Галіна Абакунчык і Сяргей Кавалёў.
Нашыя калегі распавядаюць, што побач з супрацоўнікамі ДАІ, якія спынілі іх аўта, стаіць аўтобус з міліцыянтамі. Сілавікі сачылі за журналістамі «Белсату» яшчэ падчас пікету.
Сяргей Кавалёў паведаміў, што іх даставілі ў ГАУС у Жодзіна.
КТ belsat.eu
