Усе лішкі трускавак, якія сёлета маюць беларусы, будуць скупленыя. Пра гэта заявіў старшыня праўлення Беларускага рэспубліканскага саюзу спажывецкіх таварыстваў Валерый Іваноў.
«Кіраўнік дзяржавы паставіў перад намі дакладную задачу – закупіць у насельніцтва ўсе лішкі клубніц, і мы гэта выканаем», – сказаў старшыня Белкаапсаюзу, перадае БелТА.
Закупляць ягады арганізацыя будзе яшчэ максімум дзесяць дзён.
Валерый Іваноў таксама патлумачыў, чаму ў першыя дні нарыхтоўкі трускавак у грамадзянаў кааперацыя закупляла іх даражэй, чым цяпер: кілаграм таварных ягадаў каштаваў Br5-10. З ростам прапанавання цана знізілася. Сёння кошт таварных ягадаў складае ад Br1-1,2 за кг, клубніцы, якія ідуць на прамысловую перапрацоўку, каштуюць Br0,5 за 1 кг. Бочкавыя ягады, што пойдуць на выраб пладова-ягаднага віна, бяруць па Br0,3.
Разам з тым росту коштаў на ягады чакаць не даводзіцца. Як распавёў Валерый Іваноў, больш дарагія ягады пазней было б складана перапрадаць.
Нагадаем, што праз небывалы ўраджай трускавак у шэрагу рэгіёнаў Беларусі склалася такая сітуацыя, што вяскоўцам лягчэй выкінуць ягады, чым здаваць яе за капейкі скупшчыкам.
МГ belsat.eu
