«Белгазпрамбанк» паведаміў пра прыпыненне шэрагу аперацыяў з 16 чэрвеня. Але на наступную раніцу іх аднавіў.
Аперацыі прыпыняліся з 23:00 16 чэрвеня, а ўжо з 08:30 17 чэрвеня яны былі адноўленыя.
У кол-цэнтры «Белгазпрамбанку» на пытанне нашага карэспандэнта адзначылі, што не ведаюць пра прычыны прыпынення аперацыяў, а таксама ці будуць ужывацца якіясьці абмежаванні надалей.
Прыпынялася зняцце наяўнай замежнай валюты ў Беларусі з выкарыстаннем банкаўскай карткі «Белгазпрамбанку», эмітаванай да бягучага рахунку з БПК у рублях у банкаматах і касах «Белгазпрамбанку» і банкаматах іншых банкаў Беларусі.
Таксама было спыненае папаўненне карткі ў банкаматах, касах і інфакіёсках «Белгазпрамбанку», у тым ліку на «Белпошце».
Адмяняліся Р2Р-пераводы (з карткі на картку) паміж карткамі «Белгазпрамбанку».
Апроч таго, у Беларусі былі прыпыненыя безнаяўныя аперацыі ў замежнай валюце, у тым ліку на беларускіх сайтах (напрыклад, для набыцця квіткоў), з выкарыстаннем рублёвай карткі «Белгазпрамбанку».
Астатнія аперацыі з выкарыстаннем банкаўскіх картак ажыццяўляліся без зменаў.
З 15 чэрвеня Нацыянальны банк Беларусі прызначыў Надзею Ермакову кіраўніцаю часовай адміністрацыі «Белгазпрамбанку». Паўнамоцтвы кіраўніцтва банку былі прыпыненыя на фоне крымінальных справаў за адмыванне грошай і нясплату падаткаў, якія былі распачатыя пасля ўдзелу шматгадовага кіраўніка банку Віктара Бабарыкі ў прэзідэнцкай кампаніі.
МГ belsat.eu
