З 18 лістапада авіякампанія «Белавія» пераходзіць на новую структуру тарыфаў. Паводле кампаніі, гэта дазволіць пасажырам самастойна абіраць набор паслуг для пералёту. Таксама павялічваецца вага ручнога багажу – з 8 да 10 кг.
У новай сістэме тарыфаў будуць даступныя безбагажныя тарыфы. Колькасць месцаў і кошт квіткоў на розных тарыфах будзе вагацца ў залежнасці ад ёмістасці самалёту, колькасці пасажыраў і іншых фактараў. Розніца паміж коштам безбагажнага пералёту і мінімальным коштам квітка з багажом па маршруце «туды-назад» будзе да 65 еўра ў залежнасці ад кірунку. Гэтак, мінімальны кошт квітка «туды-назад» без багажу ў Калінінград будзе пачынацца ад 85 еўраў (мінімальны кошт з багажом раней і зараз быў ад 115), з Менску ў Прагу – ад 166 (мінімальны кошт раней з багажом – ад 204, зараз – ад 191), з Менску ў Кіеў – ад 109 (мінімальны кошт раней з багажом – 134, зараз – 139).
Усе тарыфы авіякампаніі падзеленыя на пяць груп: «Прома», «Лайт», «Смарт», «Флекс» і «Бізнес».
На тарыфах «Прома» і «Лайт» будуць прапаноўвацца самыя танныя квіткі. Абодва брэнда дазваляюць бясплатна перавезці толькі ручную паклажу вагой да 10 кг. Пры неабходнасці куплі багажу кошт правозу адной валізкі зніжаны з 50 да 25 еўраў для дадзеных брэндаў.
На тарыфе «Смарт» ужо ўключаны бясплатны правоз аднаго месца ручной паклажы вагой да 10 кг і зарэгістраванага багажу вагой да 23 кг. Тарыфы «Смарт» таксама дазваляюць бясплатны папярэдні выбар асобных катэгорыяў месцаў на борце самалёта.
Умовы тарыфу «Флекс» дазваляюць, акрамя бясплатнага правозу ручной паклажы, бясплатны правоз аднаго месца багажу вагой да 32 кг. Таксама даецца бясплатная паслуга папярэдняга выбару месца ў салоне, змены даты вылету і вяртання квітка.
«Бізнес» тарыф уключае ў сябе бясплатны правоз двух месцаў ручной паклажы вагой да 10 кг кожнае і двух месцаў зарэгістраванага багажу вагой да 32 кг кожнае, бясплатны папярэдні выбар месца на борце і магчымасць змены і вяртання квітка да і пасля вылету. Акрамя таго, такім пасажырам прапануецца прыярытэтная пасадка, абслугоўванне ў бізнес-зале і асобная стойка рэгістрацыі.
Спартыўны рыштунак перавозіцца без дадатковай аплаты на тарыфах «Смарт», «Флекс» і «Бізнес».
Новыя правілы тарыфаў распаўсюджваюцца на квіткі, набытыя з 18 лістапада ў межах новай тарыфнай канцэпцыі. Новыя правілы пра памеры кожнага месца ручной паклажы ўжываюцца да ўсіх квіткоў.
На безбагажных тарыфах ручную паклажу нельга будзе здаваць у багаж. У сувязі з гэтым варта памятаць, што забаронены правоз усіх вострых, рэжучых і колючыя прадметаў, выбуховых рэчываў, сціснутых і звадкаваных газаў. У ручной паклажы дазваляецца правозіць вадкасці агульным аб’ёмам 1 літр ва ўпакоўках не больш за 100 мл.
МГ belsat.eu
