«Белавія» абяцае апублікаваць аўдыязапіс з пагрозамі Кіева падняць у неба знішчальнікі
Паводле намесніка генеральнага дырэктара Нацыянальнай авіякампаніі «Белавія» Ігара Чаргінца, пагроза ўкраінскіх авіядыспетчараў падняць у паветра знішчальнікі, калі беларускі «Боінг» не вернецца ў кіеўскі аэрапорт «Жуляны», захаваўся на запісах перамоваў экіпажу з авіядыспетчарамі.
Раней стала вядома, што начальнік апарату кіраўніка Службы бяспекі Украіны Аляксандр Ткачук зняпраўдзіў інфармацыю пра тое, што беларускаму пілоту пагражалі баявымі знішчальнікамі.
«Запіс перамоваў экіпажа з наземнымі службамі вядзецца на ўсіх самалётах. Калі спатрэбіцца, мы яго расшыфруем», – сказаў Чаргінец у каментары ria.ru.
- СБУ зняпраўдзіла інфармацыю пра тое, што пілоту «Белавія» пагражалі баявымі знішчальнікамі
- «Белавія» будзе патрабаваць у Украіны кампенсацыі выдаткаў за прымусовую пасадку ў Кіеве
Пасля пасадкі ў Кіеве праваахоўныя органы Украіны знялі з самалёту аднаго з пасажыраў – грамадзяніна Арменіі.
Знятага з рэйсу пасажыра ўкраінскія праваахоўнікі адпусцілі, ён вылецеў у Менск.
СБУ не афішуе інфармацыю пра асобу знятага з самалёта «Белавія» чалавека, у тым ліку і дадзеныя аб нацыянальнасці або грамадзянстве – уся інфармацыя пакуль толькі для службовага карыстання.
Медыі паведамляюць, што самалёт пасадзілі праз вядомага актывіста «Антымайдану» Армена Марцірасяна, які зʼехаў з Кіева ў Маскву ў 2014 годзе.
22 кастрычніка Міністэрства замежных справаў выклікала часовага паверанага ў справах Украіны ў Беларусі Валерыя Джыгуна. У МЗС кіраўніку ўкраінскай дыпламатычнай місіі ўручылі ноту пратэсту ў сувязі з дзеяннямі ўкраінскіх праваахоўнікаў па прымусовым вяртанні самалёта «Белавіі», які ляцеў з Кіева ў Менск.
