Сёння ў Беластоку – у Дзень роднай мовы – беларусы Падляшша сустрэліся, каб сумесна праверыць веды беларускай мовы.
Арганізатарам мерапрыемства, якое з кожным годам становіцца ўсё больш папулярным, з’яўляецца арганізацыя прыватных школаў святых Кірылы і Мяфодзія ў Беластоку. Беларуская і ўкраінская мовы выкладаюцца ў іх як мовы нацыянальных меншасцяў.
У дыктоўцы прынялі ўдзел як вучні, так і старэйшыя аматараў беларускай мовы.
Праверыць свае веды па-беларуску ў «Дыктоўцы» сёлета вырашла рэкордная колькасць людзей, больш за 60 асобаў. Былі, у прыватнасці, вучні з Беластоцкай гімназіі № 7 і з школы ў Нарве. А таксама мясцовыя актывісты і журналісты.
Упершыню на «Дыктоўку» прыехала група маладых асобаў з Беларусі – вучні ліцэю імя Машэрава з Берасця ў суправаджэнні прадстаўніка амбасады Беларусі.
«Дыктоўку на працягу многіх гадоў пісала толькі наша школа, а цяпер ідэю перанялі і іншыя: «Дыктоўка» ужо ладзіцца ў Бельску Падляскім», – распавяла «Белсату» настаўніца беларускай мовы Яна Марко, арганізатар мерапрыемства.
Пасля афіцыйнай і мастацкай часткі мерапрыемства ў выкананні маладых беларусаў Падляшша, пачалася дыктоўка. Удзельнікаў падзялілі на тры групы – адна «дарослыя» і дзве «дзіцячыя».
Усе тры працавалі з рознымі тэкстамі – кожны быў прысвечаны асобе праваслаўнага манаха, архімандрыта Гаўрыіла. У 2012 годзе Юры Каліна зняў пра яго дакументальны фільм створаны «Белсатам».
«Белсат» з’яўляецца інфармацыйным спонсарам і партнёрам беларускай дыктоўкі. Адзіная ў Беларусі беларускамоўная тэлевізійная станцыя ў Беларусі, асабліва сёлета падкрэслівае значэнне беларускай мовы.
У межах кампаніі «Беларускамоўны» заахвочваем грамадзянаў Беларусі вывучаць і выкарыстоўваць нацыянальную мову ў паўсядзённым жыцці. Цяпер штодзённа родную мову выкарыстоўвае каля 3 % жыхароў Беларусі.
pj/belsat.eu; фота: belsat.eu
