І цяпер пра беларусаў, якія едуць забіваць сваіх славянскіх братоў ва Украіне. А з імі ў Сінявокую трапляе зброя, боепрыпасы, а самае галоўнае – небяспека для кожнага з нас. Нарэшце да справы прыгледзіўся Аляксандр Лукашэнка. І нашыя суайчыннікі, што сталі прарасейскімі баевікамі, маюць адказваць з усёй суровасцю закону.
Галоўнае ўпраўленне барацьбы з арганізаванай злачыннасцю і карупцыяй вырашыла праверыць 16 беларускіх грамадзянаў, якіх падазраюць ва ўдзеле ў баявых дзеяннях на Данбасе. На гэты раз размова не толькі пра беларускіх добраахвотнікаў, што ваююць за Украіну, але і аб чальцах ДНРаўскіх і ЛНРаўскіх груповак. Крымінальных справаў пакуль не распачалі. Пра беларусаў з прарасейскімі поглядамі паклапаціліся толькі пасля загаду зверху.
АЛЯКСАНДР ЛУКАШЭНКА, КІРАЎНІК БЕЛАРУСІ:
«Баевікі ды іншыя, што ваявалі ў Данбасе, пазуюць ужо ў Менску са зброяй… Таму разбірайцеся імгненна, разам з міліцыяй і КДБ. Ніякіх пазёраў і ніякіх баевікоў у краіне быць не мусіць».
Заява прагучала напярэдадні падчас нарады на тэму дзяржаўнай мяжы з Украінай. З Расеяй мяжа празрыстая, таму «пазёры са зброяй» спакойна ездзяць у Беларусь адтуль. І выстаўляюць у сацыяльныя сеткі фатаграфіі то з Менску, то з Данецку.
«Мы знаходзімся пад Данецкам. Выведка!».
А гэтае відэа «Белсату» прапанаваў гарадзенец, што падвёз цікавага спадарожніка. Хлопец прадставіўся Аляксеем, наймітам-спецназаўцам з 10-й асобнай брыгады ГРУ, што ў Краснадары. Па дарозе беларус-баявік распавёў і пра ваеннае жыццё, і як ездзіць да мамы на Гарадзеншчыну.
«– Нас паціху цяпер шчымяць. У вышуку мы…
– КДБ?
– Так.
…
– Ты колькі людзей забіў?
– Не падлічваў.
– А прыкладна?
– Чалавек 150.
– З чаго?
– З СВД-16 забіў 20 чалавек».
Адзін з беларусаў-баевікоў даслужыўся ў бутафорскай рэспубліцы да даволі высокага чыну. Яўгеній Конанаў, былы дэсантнік з Марʼінай горкі, стаў падпалкоўнікам і замкамбрыгам мотастралковай брыгады.
ЯЎГЕНІЙ КОНАНАЎ, ПАДПАЛКОЎНІК «РЭСПУБЛІКАНСКАЙ ГВАРДЫІ ДНР»:
«Урачыста прысягаю памнажаць славу злучэння пад сцягам якога іду ў бой».
Вось толькі на днях Конанава забілі ў Данецку. «Белсат» адшукаў сябра забітага падпалкоўніка ДНР. Жыў Конанаў вось у гэтым доме на Дняпроўскім бульвары. Але жыццё не задалося.
ВІТАЛІЙ ШЭЙНІН, СЯБАР ЯЎГЕНІЯ КОНАНАВА:
«Пасля войска, малады, зрабіў крадзеж і яго трошкі асудзілі. Пасля суду ён прыйшоў у 98-м годзе, не мог знайсці працу. Так мы з ім зʼехалі на Маскву».
З Масквы Конанаў і адправіўся ваяваць за пашырэнне Расеі. Матывы самыя матэрыяльныя.
ВІТАЛІЙ ШЭЙНІН, СЯБАР ЯЎГЕНІЯ КОНАНАВА:
«Любоў прыходзіць і сыходзіць, а кушаць хочацца ўсігда».
Але хапае і ідэалагічных прыхільнікаў сепаратызму. Адна з самых вядомых беларусак-баевікоў – снайперша Наталля з Барысава.
НАТАЛЛЯ КРАСОЎСКАЯ, СНАЙПЕР ДНР З БАРЫСАВА:
«Мне надакучыла падтрымліваць апалчэнне праз інтэрнэт».
Вайна на Данбасе ідзе амаль 2 гады. І ўвесь гэты час у Беларусі спакойна дзейнічаюць казацкія суполкі, што вучаць падлеткаў ваяваць у беларускіх балотах пад песні пра вялікую і магутную Расею.
ПЁТР ШАПКО, КІРАЎНІК «КАЗАЦКАГА СПАСУ»:
«Гэта заняткі і па рукапашным баі, і стральба з пісталета, і з пнеўматычнай вінтоўкі… Дзяржава не ставіць нейкіх перашкодаў у гэтым, і ёсць розныя рычагі і магчымасці, прадугледжаныя заканадаўствам, каб такія людзі, як у нас, маглі працаваць».
Гэтая практыка зʼявілася не цяпер. Ідэалагічна падрыхтаваныя «казацкія дзеці» паспелі ўжо адслужыць ва Унутраных Войсках ды вайсковым спецназе ў Марʼінай Горцы. Цяпер некаторыя з іх ваююць на Данбасе за Расею. А ў Беларусь прыязджаюць да мамы.
Яраслаў Сцешык, «Белсат»