Беларуская чэмпіёнка і выкладчыца па танцу на пілоне Кацярына Паграбіцкая паўдзельнічала ў «Танцах» на канале ТНТ і прайшла адбор у пяты сезон шоу.
Дзяўчына танцавала пад беларускамоўную песню Паліны Рэспублікі «Як ты».
«Мая вучаніца прынесла мне гэты трэк. Я закахалася ў песню і падумала, што няма нічога лепшага, чым прадстаўляць сваю краіну пад гэтую песню, бо песня была пра радзіму і тое, што сэрцам мы заўсёды са сваёй краінай. Я вырашыла, што вышыванка дапаможа мне перадаць усе мае эмоцыі ў танцы і дапоўніць вобраз. Я люблю беларускую культуру», – распавяла Кацярына Паграбіцкая belsat.eu.
Перад выступам вядоўца запытала Кацю, ці яна будзе танцаваць «расейскую народную». «Не, гэта вышыванка. Я з Менску», – адказала танцорка.
У размове з belsat.eu Кацярына распавяла, што сумнявалася ці варта ехаць на конкурс.
«Я не ведала ці змагу прайсці кастынг. Перад выхадам так хвалявалася, што не адчувала ані рук ані ног», – кажа Кацярына.
«Тонка і чароўна» – гэтак журы ацанілі ейны танец.
Кацярына таксама прызналася, што вельмі б хацела выступіць з гэтым нумарам на міжнародных спаборніцтвах.
Удзельнікі праекту «Танцы» змагаюцца за званне лепшага танцора Расеі і галоўны прыз у памеры 3 000 000 рублёў (больш $ 45тыс.).
22-гадовая Кацярына Паграбіцкая неаднаразова станавілася прызёрам шматлікіх міжнародных і рэспубліканскіх спаборніцтваў. Пачынала сваю спартовую прыгоду з харэаграфіі і акрабатыкі. Дзяўчына кіруе і выкладае ў студыі танца і акрабатыкі на пілоне Go Up Pole Dance Studio.
ДР belsat.eu