Беларусь зацікаўлена ў крэдыце Еўрапейскага банку рэканструкцыі і развіцця ў памеры да $ 1 млрд для крэдытавання найбольш пацярпелых праз пандэмію сектараў эканомікі, піша БелТА.
Пра гэта ішла размова на сустрэчы першага намесніка прэм’ер-міністра Беларусі Дзмітрыя Крутога з віцэ-прэзідэнтам ЕБРР Аланам Пію ў фармаце відэаканферэнцыі.
Беларускі бок зацікаўлены ў прадстаўленні крэдытных рэсурсаў ЕБРР буйным дзяржаўным банкам – Беларусбанку, Белаграпрамбанку, Белінвестбанку, Банку развіцця ў абʼёме да $ 1 млрд, у тым ліку для малых і сярэдніх кампаніяў з найбольш пацярпелых сектараў эканомікі.
«Што датычыць сумеснага фінансавання з іншымі фінансавымі інстытутамі (Сусветны банк, Азіяцкі банк інфраструктурных інвестыцыяў, Еўрапейскі інвестыцыйны банк) – тут мяркуецца захаванне лімітаў для дзеючых кліентаў ЕБРР у Беларусі, пашырэнне мандату на крэдытаванне асобных дзяржаўных арганізацый, якія апынуліся ў складаным становішчы», – сказаў Дзмітрый Круты.
Гаворка пра «Белавію», Беларускую чыгунку, «Гомельшкло», прадпрыемствы дрэваапрацоўкі, дадаў ён.
Бакі дамовіліся выкарыстоўваць паскораную працэдуру падрыхтоўкі адпаведных рашэнняў і актыўна выкарыстоўваць фармат відэаканферэнцыі.
КА belsat.eu