Міністэрствы ўнутраных справаў Беларусі і Расеі плануюць завяршыць фармаванне супольнага спісу неўязных грамадзянаў, а таксама стварыць супольны спіс невыязных. Пра гэта паведамляе БелТА.
Па выніках паседжання 7 лютага ў Віцебску міжведамаснай працоўнай групы, ведамствы заявілі, што да 1 сакавіка збіраюцца сфармаваць агульны спіс неўязных грамадзянаў. Таксама дамоўлена падрыхтаваць пагадненне, якое будзе рэгламентаваць пытанні абмену інфармацыі ў галіне міграцыі ў дачыненні да ўласных грамадзянаў, заявіў начальнік Дэпартаменту грамадзянства і міграцыі МУС Беларусі Аляксей Бягун.
У сувязі з чэмпіянатам свету па хакеі ў 2021 годзе ў Менску і матчамі чэмпіянату Еўропы па футболе 2022 года ў Санкт-Пецярбургу бакі абмеркавалі магчымасць заключыць пагадненне, якое дазволіць грамадзянам трэціх краін ажыццяўляць транзіт праз тэрыторыю Расеі і Беларусі для ўдзелу ў міжнародных падзеях.
Таксама, заявіў намеснік начальніка галоўнага ўпраўлення па пытаннях міграцыі МУС Расеі Дзмітрый Дземідзенка, у бліжэйшы час можа быць зацверджаны праект канцэпцыі міграцыйнай палітыкі Саюзнай дзяржавы.
Пагадненне дазволіць замежным грамадзянам, з якімі ў дзвюх краін супадаюць агульны рэжым знаходжання, перасякаць унутраную мяжу Беларусі ды Расеі чыгуначным і аўтамабільным транспартам.
МГ belsat.eu
