Менску ды Маскве засталося развязаць тры групы пытанняў. Пра гэта заявіў міністр эканамічнага развіцця РФ Максім Арэшкін пасля сустрэчы ў Санкт-Пецярбурзе кіраўнікоў дзвюх краін.
Расейскі міністр удакладніў, што няўзгодненыя пытанні датычаць нафтавай, газавай і падатковай сфераў, піша БелТА.
«Гэта тры групы пытанняў, якія засталося вырашыць для таго, каб фіналізаваць усе дарожныя мапы», – сказаў Арэшкін.
Паводле яго, пасля сустрэчы ў Сочы 7 снежня бакі здолелі цалкам узгадніць пытанні ў сферах сельскай гаспадаркі, сувязі, мытні, рэгулявання алкагольнага рынку.
У сваю чаргу кіраўнік Беларусі заявіў, што бакі бакі канцэптуальна дамовіліся адносна энерганосьбітаў.
«Канцэптуальна дамовіліся, што ў будучым годзе Беларусь купляе ў Расейскай Федэрацыі прыкладна 20 млрд куб.м газу. Абмежаванняў тут няма. Можна і 22 млрд куб.м. З уводам атамнай станцыі, вядома, мы на 4-5 млрд куб.м менш будзем закупляць. Таму па аб’ёмах мы дамовіліся, і па нафце дамовіліся, што купім у Расеі 24-25 млн т нафты», – адзначыў Аляксандр Лукашэнка.
Паводле яго, канкрэтныя цэны будуць вызначаны ў бліжэйшыя два-тры дні. Беларускі кіраўнік падкрэсліў, што ў цэлым цана застаецца на ўзроўні 2019 года.
МГ belsat.eu
