Беларусь і ЕЗ спросцяць візавы рэжым да 2 лютага 2020 года


Пагадненне аб спрашчэнні візавага рэжыму паміж Беларуссю і Еўрапейскім Звязам плануецца падпісаць да 2 лютага 2020 года, калі мусяць запрацаваць змены ў візавы кодэкс і шэнгенская віза падаражэе да 80 еўра. Пра гэта пасля сустрэчы з Аляксандрам Лукашэнкам паведаміла 22 ліпеня кіраўніца прадстаўніцтва Еўразвязу ў Беларусі Андрэа Віктарын, перадае БелТА.

У выніку спрашчэння кошт шэнгенскай візы для беларусаў знізіцца да 35 еўра.

Шэнгенскія візы падаражэюць да € 80 у 2020 годзе

«Мы падпішам пагадненне аб спрашчэнні візавага рэжыму. Я не магу назваць канкрэтную дату, але фактычна ўсе дакументы ўжо падрыхтаваныя і абодва бакі праходзяць неабходныя прававыя юрыдычныя працэдуры», – сказала яна.

На самой сустрэчы Лукашэнка заявіў, што гатовы да ўзмацнення палітычнага дыялогу з ЕЗ. Паводле яго, сёння няма перашкодаў для гэтага, паведамілі ў Адміністрацыі кіраўніка Беларусі.

«Давайце будзем у гэтым кірунку рухацца, не чакаючы якіх бы там ні было падзеяў: ці то парламенцкіх, ці то прэзідэнцкіх выбараў. Думаю, нашы адносіны важнейшыя за ўсякія палітычныя кампаніі ў вас ці ў нас«, – падкрэсліў ён.

Ці падаражэе шэнген, а калі так, то чаму?

Кіраўнік Беларусі падзякаваў за фінансавае падтрыманне, якую ЕЗ робіць праектам у Беларусі, у тым ліку ў развіцці інфраструктуры.

Андрэа Віктарын у сваю чаргу дадала, што за апошнія некалькі год Беларусі і Еўрапейскаму саюзу ўдалося пабудаваць даверныя стасункі ды адкрыты дыялог як па палітычных тэмах, так і па эканамічных.

МГ belsat.eu

Глядзі таксама
Каментары